Túrkistan politseileri tereńdigi 5 metrlik dárethanaǵa túsip ketken 3 jáne 10 jasar balalardy aman alyp shyqty, dep habarlaidy "Ult aqparat".
Saryaǵash politsiiasynyń 102 nómirine jergilikti turǵyn áiel habarlasyp, úiiniń aýlasyndaǵy dárethanasynyń ishine óziniń 3 jasar uly men 10 jasar qyzynyń abaisyzda túsip ketkenin aityp kómek suraǵan.
Habarlamany birinshi bolyp alǵan Saryaǵash APB ýchaskelik politsiia inspektorlary politsiia maiory Nurdaýlet Edilov pen politsiia kapitany Asyl Erejepov, sondai-aq politsiia aǵa leitenanty Aisultan Sapar oqiǵa bolǵan jerge nebary 2 minýt ishinde jedel jetti.
Sodan politseiler eki jasóspirimniń ómirine qaýip tóngenin eskerip, eshteńege qaramastan balalardy qutqarmaqqa asyǵady.
Sebebi 5 metrlik ájethana ishindegi nájis 10 jasar qyzdyń iyǵyna deiin jetken. Al jasóspirim qyz janyndaǵy 3 jasar bala, iaǵni inisin nájiske batyp ketpesi úshin kóterip alyp turady.
Politseiler qutqarýdan keshikse balalar iisten ýlanyp qalýy da múmkin edi, sondyqtan qos qyzmetker jedel túrde áreket etip, betonnan jasalǵan ájethana edenin temir quralymen soqqylap buzdy.
Bir jaǵynan tártip saqshylary ájethana edenin buzyp jatyp, ishindegi balalarǵa qaýip tónbesi úshin, ádispen áreket etti.
Sodan soń politsiia kapitany Asyl Erejepov arnaiy jipti beline bailap, 5 metr tereńdiktegi ájethana ishinen birinshi 3 jasar uldy, artynsha 10 jastaǵy qyzdy aman esen alyp shyqty.
Osylaisha Saryaǵash APB-nyń qos politseii ózderiniń jedel áreket etýi men qalaida balalardy qutqarýǵa baryn salyp, qaisarlyq tanytyp áreket etýiniń arqasynda olar aman qaldy.
Osy rette politseilerdiń áreketine riza bolǵan jáne balalarynyń ájethanadan aman shyqqanyna qýanǵan anasy Ajarkúl Sarjanova analyq alǵysyn aitty.
«Otbasymnyń aýlasynda keleńsiz jaǵdai oryn aldy. Sol sebepti biz shuǵyl túrde Saryaǵash aýdanynyń politseilerine jedel túrde habarlastyq. Sol mezette tez arada kelgen Saryaǵash APB Qaplanbek aýylynyń ýchaskelik politsiia inspektorlary Asyl Erejepov pen Nurdáýlet Edilov, Aisultan Saparov kelip, óz kómekterin kórsetti. Shuǵyl túrde aman esen balalarymdy alyp shyqty. Sol sebepti osy politsiia qyzmetkerlerine analyq alǵysymdy aitqym keledi jáne de osy qyzmetkerler tiisti deńgeide marapattalsa eken deimin. Jumysyna tabys tileimin!», - dedi.
Sodan soń osy oqiǵaǵa kýá bolǵan turǵynnyń kórshileri de óz rizashylyǵyn bildirdi:
«Bizge kelip aiqailap kómek surady. Politseilerge habarlastyq, nebary 2 minýt ishinde tez arada kelip, balalardy qutqardy. Olarǵa alǵysymyz sheksiz. Olar óte jaqsy jumys istedi. Eger bizdiń ýchaskelik politseiimiz bolmasa, biz olardy qutqara almas edik. Úlken raqmet politseilerge!», - dedi.
Búginde politseilerdiń basty mindeti qoǵamdyq qaýipsizdikti qamtamasyz etý bolǵanymen, olar turǵyndarǵa kómek kerek kezde birinshi kezekte qaýip-qaterge qaramastan jedel áreket etedi.
Buǵan deiin de qanshama tártip saqshylary ajal aýzynda qalǵan azamattar men balalardy qutqaryp, alǵystaryn alǵan bolatyn.
Sondyqtan kieli óńirdiń politseileri bul baǵyttaǵy jumystardy árdaiym nazarda ustamaq.
