Qaraǵandy oblysy Saran qalasyna qarasty qaraýsyz qalǵan bes qabatty ondaǵan úi qalpyna keltiriledi. Bul úiler RTB zaýyty (Rezino-tehnikalyq buiymdar zaýyty) aýdanynda ornalasqan, dep habarlaidy "Ult aqparat".
1990 jyldardyń basynan beri munda 106 úi iesiz qaldy. Qazirgi ýaqytta olarǵa tekserý júrgizildi, teń jartysy qaita jóndeýge jatpaidy. Ýaqyt óte kele olardy buzyp, ornyna jańa úiler salý josparlanyp otyr.
Kenttiń jandanýyna QazTehna avtobýs zaýytynyń ashylýy jáne reseilik «Tatneft» kompaniiasynyń avtomobil shinalaryn shyǵaratyn kásiporynnyń qurylysy túrtki boldy.
«Jańa indýstriialyq aimaqtyń qurylýy jáne iri óndiris qurylysynyń bastalýy shaǵyn aýdannyń 11 gektar turǵyn úi aimaǵyn qalpyna keltirýge múmkindik berdi. Qazir sot arqyly páter boiynsha zańdy «tazartýdan» ótken jáne balansqa qoiylǵan úiler qalpyna keltirilýde. Ótken jyly biz eki úidi qalpyna keltirdik. Olardyń birinde – 60 páter, ekinshisinde – 30. Halyqtyń áleýmettik osal toptaryna páterler berildi. Biyl toǵyz úidi qalpyna keltirý jumystary bastaldy», – dep atap ótti Saran qalasynyń ákimi Erjan Temirhanov.
Kelesi jyly toǵyz úidi tapsyrý josparlanýda. Barlyǵy 510 páter bolady. Bul – kezekte turǵandar, dárigerler men kásiporyn qyzmetkerleri úshin jalǵa beriletin jáne qyzmettik turǵyn úi. Búgingi tańda Saran qalasynda páter kezeginde myńǵa jýyq adam tur.
Injenerlik jelilermen – sýmen, elektr qýatymen turǵyndarda problemalar joq. Úilerdi jylýmen qamtamasyz etý úshin modýldik qazandyq salynady.
Úilerdi qalpyna keltirýmen qatar aýlalar abattandyrylyp, joldar asfalttalady. Áleýmettik infraqurylym qalyptasýda. Balabaqsha men sport keshenin salý úshin jer telimi satyp alyndy. «Saryarqa» ÁKK birlesip áleýmettik pavilon ornatady.
«Sondai-aq, áleýmettik dárihana bolady, politsiia bólimin ashamyz. Qazirdiń ózinde shaǵyn aýdanda beinebaqylaý ornatylǵan, iaǵni qaýipsiz ortany qalyptastyrýǵa bolady. Jalpy, biz jyl saiyn 10 úidi qalpyna keltirýdi josparlap otyrmyz. Buzylǵan kóp qabatty úilerdiń ornyna jańa qurylys salynady», – dedi Erjan Temirhanov.
«Men qyzymmen birge sáýir aiynan beri turamyn. «Jetim balalar» sanaty boiynsha eki bólmeli páterdi tez rada aldym. Qazir qurylys belsendi júrip jatyr. Úilerdi qalpyna keltirýden basqa, jol jasalýda, oiyn alańy ornatyldy. Maǵan bári unaidy. Avtobýs júredi, qajet jerge jetý múmkindigi bar. Ázirshe bala kútimine bailanysty demalysta otyrmyn, «Saran» shahtasynda aspaz bolyp jumys isteimin. Kásiporynnyń janynda jumys bolatyny jáne shaǵyn aýdan jandanatyny jaqsy», – deidi qalpyna keltirilgen úilerdiń biriniń turǵyny Violetta Filipova.
