QR Aýyl sharýashylyǵy ministri Saparhan Omarov saladaǵy sýbsidiialaý týraly túsinik berdi, dep habarlaidy QazAqparat.
«Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasynyń iske asyrylýy, sondai-aq ótken jyly qabyldanǵan daǵdarysqa qarsy sharalar koronavirýs pandemiiasymen bailanysty kúrdeli jaǵdailarda otandyq agroónerkásiptik keshenniń turaqty damýyn qamtamasyz etýge múmkindik berdi. Máselen, jalpy aýyl sharýashylyǵy óniminiń kólemi 5,7%-ǵa artyp, 6,3 trln teńgeni qurady. Bul – Eýraziialyq ekonomikalyq odaq elderi arasyndaǵy eń úlken ósim. Azyq-túlik óndirisi 4%-ǵa ósti», - dedi S. Omarov Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda.
Onyń aitýynsha, aýyl sharýashylyǵynyń negizgi kapitalyna salynatyn investitsiialar kólemi 15%-ǵa, tamaq ónimderi óndirisine quiylǵan investitsiialar kólemi 13,5%-ǵa ósti. Nátijesinde, agroónerkásiptik keshenge salynǵan investitsiialardyń jalpy kólemi 677,2 mlrd teńgeni qurap, josparly mánnen 154,2 mlrd teńgege asyp tústi.
«Salanyń jyl saiyn tolyq qarjylandyrylmaýyna qaramastan, daǵdarysqa qarsy sharalardy eskere otyryp, ótken jyly sýbsidiialaý kólemi 366 mlrd teńgege deiin jetkizildi, bul 2016 jylǵy deńgeiden 1,6 ese kóp. Bul rette sýbsidiialaý barynsha jeńildetilip, tolyqtai avtomattandyryldy, bul sýbsidiia berý protsesiniń ashyqtyǵyn qamtamasyz etýge múmkindik beredi. Sýbsidiialaýǵa qoiylatyn talaptarǵa ózgerister engizý arqyly shaǵyn jáne orta fermerlerdi sýbsidiialaýmen qamtý aýqymy keńeitildi», - dedi ministr.
Ósimdik sharýashylyǵyndaǵy barlyq sýbsidiialar biryńǵai qaǵidalarǵa biriktirildi. Ósimdikterdi qorǵaý quraldaryn sýbsidiialaý keńeitildi. Endi gerbitsidter ǵana emes, pestitsidterdiń basqa da túrleri sýbsidiialanady. Sýbsidiialardy kúntizbelik jyl aiasynda emes, tuqym, tyńaitqysh, pestitsid satyp alynǵan kúnnen bastap 12 ai ishinde alý múmkindigi basty jańalyqtardyń biri bolyp otyr.
