Shyǵys Qazaqstan oblysyna jumys sapary aiasynda «Samuryq-Qazyna» AQ Basqarma tóraǵasy Nurlan Jaqypov óńirdegi áielder men balalarǵa mamandandyrylǵan kómek kórsetetin zamanaýi meditsinalyq mekeme – Ana men bala ortalyǵyna bardy, dep habarlaidy ult.kz.
Kompaniianyń Telegram-arnasynda jariialanǵan aqparatqa súiensek, sapar barysynda Nurlan Jaqypov ortalyqqa zamanaýi meditsinalyq jabdyqty – navigatsiia júiesi men jasandy intellekt tehnologiiasy bar Remebot RM-200 robottandyrylǵan neirohirýrgiialyq júiesin jetkizýge sertifikat tabystady. Joba quny 433,5 mln teńge.
Atalǵan jabdyq ortalyqqa alǵash ret satyp alynbaq jáne joǵary dáldiktegi stereotaktikalyq neirohirýrgiialyq operatsiialar júrgizýge arnalǵan. Júie dárigerlerge otany josparlaýǵa, navigatsiia júrgizýge jáne ota jasaý ornyn joǵary dáldikpen anyqtaýǵa múmkindik beredi.
Bul rette robot hirýrgti almastyrmaidy, kerisinshe otanyń dáldigi men qaýipsizdigin arttyratyn tehnologiialyq qural retinde qyzmet etedi. Keshenniń tehnikalyq qýaty jylyna 500–750 otaǵa deiin jetedi. Alǵashqy kezeńde jyl saiyn shamamen 200 ota júrgizý josparlanyp otyr, keiin bul kórsetkishti 450-ge deiin arttyrý kózdelgen.
«Samuryq-Qazyna» korporativtik áleýmettik jaýapkershilikti adamdardyń ómir súrý sapasyna baǵyttalǵan uzaq merzimdi investitsiia retinde qarastyrady. 2023 jyldan beri Qor jalpy somasy 880 mlrd teńgeden asatyn 100-den astam áleýmettik mańyzy bar jobany iske asyrdy. Bul jumystyń eleýli bóligi densaýlyq saqtaý salasymen bailanysty: óńirlerde aýrýhanalar men meditsinalyq ortalyqtar salynyp, zamanaýi jabdyqtar satyp alynady. Balalardy ońaltýdy damytýǵa da erekshe kóńil bólinedi: búginde el boiynsha 55 ońaltý ortalyǵy ashylyp, 21 myńnan astam balaǵa kómek kórsetildi. Qordyń qoldaýynyń arqasynda óńirlerde joǵary tehnologiialyq meditsinalyq kómek qoljetimdi bola tústi. ShQO-daǵy búgingi joba - sonyń bir mysaly», – dedi Nurlan Jaqypov.
