21 sáýirde Úkimette inkliýzivti saiasatty júzege asyrý sharalary qaraldy, dep habarlaidy Ult.kz.
«Samuryq-Qazyna» AQ-nyń korporativtik áleýmettik jaýapkershiligi aiasynda 2023–2026 jyldary 100-den astam áleýmettik jobany iske asyrýǵa 700 mlrd teńgeden astam qarajat bólgen.
Úkimet otyrysyndaǵy baiandamada «Samuryq-Qazyna» ókili el boiynsha 55 ońaltý ortalyǵy ashylǵanyn, onda jyl saiyn týǵannan 18 jasqa deiingi 21 myńnan astam bala tegin ońaltýdan ótetinin aityp ótti.
Kómek tserebraldy sal aýrýy, aýtizm, neiro-ortopediialyq buzylystary, Daýn sindromy jáne basqa da erekshelikteri bar balalarǵa kórsetiledi.
Nátijesinde 6 myńnan astam bala júre bastaǵan jáne 8 myńnan astam bala alǵashqy sózderin aitqan.
Al 55 ońaltý ortalyǵy barlyq óńirdiń, ásirese shalǵaidaǵy eldi mekenderdiń qajettiligin óteýge jetkilikti me? Bul týraly aitqan «Samuryq-Qazyna» AQ korporativtik basqarý, áleýmettik-eńbek qatynastary jáne eńbekti qorǵaý jónindegi basqarýshy direktory Ǵibrat Aýǵanovtyń sózinshe mundai ortalyqtarǵa shalǵai aýyldarda suranys joǵary.
Foto: azattyq-ruhy.kz
"55 ortalyq degen jai san emes, júieli túrde jumystyń nátijesi. Árine shalǵai aýyldarda suranys úlken. Infroqurylymdarǵa qatysty kriterii bar. Sol kriteriilerge infroqurylymdar daiyn bolýy kerek. Biz jergilikti atqarýshy organdarmen birlesip úlken seriktes retinde jumys atqaryp jatyrmyz. Árine osy baǵytta shalǵai jerlerde ortalyqtar ashýdy áli de qarastyramyz", - dep otyr ol.
Ońaltý ortalyqtaryndaǵy qyzmet sapasy qalai qamtamasyz etiletinine de toqtalyp ótken Ǵibrat Aýǵanov eń basty talaptarynyń biri ortalyqtardy bilikti mamandarmen qamtamasyz etý ekenin aitty. Sol maqsatta mamandardyń biliktiligin arttyrý úshin arnaiy oqytýdan ótkizedi eken.
"Sonymen qatar arnaiy qural-jabdyqtarmen qamtý jáne arnaiy metodika boiynsha balalardy ońaltýdan ótkizý. Árine osyndai júieli jumys bolmasa bul ortalyqtar jumys istemes edi", - dep aityp ótti Ǵibrat Aýǵanov.
Búgingi kúni elimizde shamamen 752 myń múgedektigi bar adam turady. Bul jalpy halyq sanynyń 3,7% quraidy. Onyń ishinde shamamen 56% eńbekke qabiletti jastaǵy adamdar.
«Samuryq-Qazyna» qory da múgedektigi bar adamdardy jumyspen qamtýǵa at salysyp jatqan kórinedi. Qazirgi tańda qor tobynyń kompaniialarynda erekshe qajettilikteri bar 3 042 adam jumys isteidi. Mysaly, Air Astana áýe kompaniiasynyń ushaqtaryna arnalǵan jastyqtar men jamylǵylardy qordyń ońaltý ortalyqtarynan ótken adamdar qaptaidy eken.
Dál osyndai úzdiksiz tásil, iaǵni týǵannan bastap derbes ómirge deiin qoldaý kórsetý – ár adamnyń áleýetin tolyq ashýǵa múmkindik beredi dep otyr qor ókilderi.
"2019 jyldan bastap «Samuryq-Qazyna» AQ-da «QSamruk» degen platforma jumys isteidi. Ol - tsifrlandyrylǵan biryńǵai júie. Bizdiń enshiles kompaniialarymyz sol arqyly jumysqa adamdardy qabyldaidy. Sol platformamyzda múmkindigi shekteýli adamdarǵa arnalǵan arnaiy tetikshe bar. Múgedektigi bar adamdar sol jerde tirkelip, bos laýazymdarǵa qatysa alady. Mysaly qazir «QSamruk» platformasyndaǵy uiashyqqa kirseńiz 30 bos jumys orny jariialanyp turǵanyn kóresiz. Bul jerde múmkindigi shekteýli jandar tek «QSamruk» arqyly ǵana jumysqa ornalasady degen sóz emes. Bizde barlyǵyna múmkindik birdei. Olar basqa da bos laýazymdarǵa qatysa alady.
Sondai-aq bizdiń rekrýterlarymyz aiyna bir ret Eńbek jáne halyqty áleýmettik qorǵaý ministrliginde múgedektigi bar azamattardy jumysqa ornalastyrý boiynsha jumys tobynda bar. Sol jumys tobyna da biz aiyna bir ret ózimizdiń bos oryndarymyzdy jiberemiz. Eń basty bizdiń qundylyǵymyz jumys oryndarynda mádeniet qalyptastyrý boiynsha, adam kapitalyn jaqsartý jáne beiimdeý boiynsha úlken jumystar atqarý", - dedi «Samuryq-Qazyna» AQ korporativtik basqarý, áleýmettik-eńbek qatynastary jáne eńbekti qorǵaý jónindegi basqarýshy direktory Ǵibrat Aýǵanov.
