Baqytjan Saǵyntaev «Almaty» telearnasynyń Akimat LIVE baǵdarlamasynyń tikelei efirinde páter kezeginde turǵan qalalyqtarǵa beriletin turǵyn úi sertifikattary jóninde aitty, dep habarlaidy QazAqparat.
Eki myń azamattyń alǵashqy tólemniń bir bóligin jabýy úshin turǵyn úi sertifikattaryn berý maqsatynda jergilikti biýdjetten 2 mlrd teńge bólindi.
Qalalyq máslihat biylǵy jyldyń 31 mamyrynda turǵyn úi kezegine turǵandarǵa tegin jáne qaitarymsyz negizde turǵyn úi sertifikattarynyń mólsherin 1 mln teńge kóleminde anyqtady, bular tómendegi sanattaǵylar:
- I jáne II toptaǵy múgedekter;
- múgedek balasy bar nemese ony tárbielep otyrǵan otbasylar;
- jetim balalar jáne ata-ananyń qaraýynsyz qalǵan balalar;
- kópbalaly otbasylar.
Sertifikattardy «Nurly jer» memlekettik baǵdarlamasy aiasynda «Shańyraq» (5-10-20) jáne Baqytty otbasy (2-10-20) baǵyttary boiynsha paidalanýǵa bolady.
Búginde bul sheshim qalalyq Ádilet basqarmasynda tirkelýde. Ótinishterdi qabyldaý sheshim tirkelgennen keiin bastalady jáne Almatynyń Turǵyn úi saiasaty basqarmasy arqyly júzege asyrylady. Qabyldaýdyń bastalǵany týraly aqparatty Basqarmanyń veb-saitynan qadaǵalaý kerek.
«Sertifikat alý úshin «Otbasy banki» AQ-da tólem qabilettiligin aldyn ala baǵalaýdan ótken qalalyqtar «Turǵyn úi sertifikattaryn berý» memlekettik qyzmet kórsetý standartyna sai ótinishpen jáne qujattarmen júginedi.
Onyń ishinde: belgili formadaǵy ótinish, ótinish berýshiniń jáne otbasy músheleriniń jeke basyn kýálandyratyn qujattar, sońǵy 6 aidaǵy kirister týraly esep, jumys ornynan anyqtama, bankten turǵyn úi zaemyn berýdi maquldaǵan hat qajet»,- dedi ákim.
Úmitkermen turǵyn úi sertifikatyn berý týraly kelisimge qol qoiylsa, onda turǵyn úi sertifikatynyń belgilengen mólsheri ótinish berýshiniń esepshotyna aýdarylady.
Turǵyn úi sertifikaty turǵyn úi zaemyn berýge kelisim alǵan, sońǵy 6 aidaǵy kirisi otbasynyń árbir múshesi úshin 106 336 teńgeden aspaityn qala turǵyndaryna beriledi.
2021 jyldyń 1 maýsymyndaǵy jaǵdai boiynsha qalada turǵyn úige muqtaj jobada qarastyrylǵan sanattar boiynsha 9 136 azamat tirkelgen, olar:
- I jáne II toptaǵy múgedekter – 2 726;
- múgedek balalary bar nemese olardy tárbielep otyrǵan otbasylar – 1 443 ;
- jetim balalar men ata-anasynyń qamqorlyǵynsyz qalǵan balalar – 1 879 ;
- kópbalaly otbasy – 3 088.
