Megapolis ákimi Baqytjan Saǵyntaev «Almaty» telearnasyndaǵy tikelei efir kezinde qala qonaqtarynyń qaýipsizdigin qamtamasyz etý jáne taýly baǵyttardy abattandyrý sharalary týraly aitty, dep habarlaidy QazAqparat.
Ákimniń aitýynsha, qalanyń árbir ekinshi qonaǵy – sheteldik týrist. Byltyr pandemiiaǵa qaramastan Almatyǵa 163 myń sheteldik qonaq kelgen. Qala turǵyndary men qonaqtary arasynda eń tanymal demalys túri – taýda serýendeý. Pandemiia kezinde taýly aimaqtarǵa barý tórt ese ósti.
«Qala turǵyndary men qonaqtarynyń ýaqyttaryn qaýipsiz ári jaily ýaqyt ótkizýi úshin qajetti jaǵdailar jasalýda. Máselen, adamdar kóp jinalatyn demalys oryndarynyń infraqurylymy retke keltirilýde: taýlar men ulttyq saiabaqtarda. 1 myń shaqyrym taýdyń jaiaý soqpaqtary tsifrlandyrylyp, 500 shaqyrymy abattandyryldy»,-deidi Baqytjan Saǵyntaev.
Onyń aitýynsha, Shymbulaqta, Medeýde vizit-ortalyqtar ashylǵan. Sondai-aq Aiýsai shatqalynda jáne «Gorelnik» termaldy kóziniń janynda da osyndai ortalyqtar jumys istei bastaǵan. Medeýde, respýblika alańynda, halyqaralyq áýejaida jáne respýblika saraiynyń janynda týristik politsiianyń 4 pýnkti ashyldy.
«Týristerdiń qaýipsizdigi úshin uialy bailanystyń aimaqtary keńeitiledi. Budan ózge, Kishi jáne Úlken Almaty shatqaldarynda 2 baqylaý-qutqarý pýnkti, Tuiyq sý qyratynda tikushaq alańy, taýly baǵyttardyń shetki toraptyq ýchaskelerinde týrister panalaityn 15 lashyq salynady. Sondai-aq, qutqarý toptaryna signal berý úshin dabyldy bastyrmalary bar 10 radioreleili baǵana ornatylady»,- dedi ol.
