Almatyda epidemiologiialyq jaǵdai kúrdeli. Bul týraly Baqytjan Saǵyntaev «Almaty» telearnasyndaǵy tikelei efir barysynda aitty, dep habarlaidy "Ult aqparat".
Onyń aitýynsha, megapolistegi epidemiologiialyq ahýal aǵymdaǵy jyldyń 18 maýsymynda SEBD mamandary tirkegen «delta» shtammynyń taralýyna bailanysty kúrdelene túsýde.
«Koronavirýstyń mýtatsiialanǵan shtamdaryn zertteý jalǵasýda. 1 shildedegi zertteýler nátijesi boiynsha koronavirýs naýqastarynan alynǵan 88 synamanyń nusqalary anyqtaldy, 67 synamada «delta» (76%), 14-inde (16%) «alfa» (britandyq), 2-ýinde neden paida bolǵany belgisiz, 3 nátije teris (3,4%), 1-inde (1,1%) COVID-19 (ýhandyq). Al 3 shildeden bastap júrgizilgen zertteýler alynǵan 45 synamanyń nusqalary mynany kórsetti, 35-inde «delta»(78%) , 6-da (13%) «alfa» (britandyq) jáne tek 1-ýinde (2,2%) COVID -19 (ýhandyq) shtammdary anyqtaldy.
Sonymen qatar, ol simptomdy naýqastar sany arta túskenin tilge tiek etti. Sońǵy 7 kúnde aldyńǵy 7 kúnmen salystyrǵanda 1,5 ese ósip otyr.
«Delta» nusqasynyń ainalymy 46%-dan 73%-ǵa deiin jyldam, bul koronavirýstyń aýyr klinikalyq kórinisterine aparady.
«Sońǵy 2 aptadaǵy jas qurylymyn taldaý balalar men jastarǵa «Delta» shtamynyń tez juǵatynyn kórsetti. Máselen, 1 jasqa deiingi naýqas balalardyń úlesi salmaǵy 0,7% - 2,8% deiin ósti; 14 jasqa deiingi balalar 0,4% - 15,0% deiin; 15 - 19 jas aralyǵyndaǵy jasóspirimder - 0,8% - 5,2% deiin jáne 40 - 59 jastaǵy azamattar - 1,5% - 24,7%»,- deidi qala ákimi.
Baqytjan Saǵyntaev qala turǵyndaryn balalar men jasóspirimderdiń jaǵdaiyna erekshe nazar aýdarýǵa shaqyrdy. Olardyń adam kóp shoǵyrlanǵan jerge barýyn shekteýi tiis.
Orta jastaǵy adamdar sanitarlyq-epidemiologiialyq qaýipsizdik sharalaryn saqtaýdy kúsheitkeni jón.
