Bokstan Rio olimpiadasyndaǵy jarys jerebesi tartyldy. Azattyq tilshisiniń habarlaýynsha, qazaqstandyq Birjan Jaqypov (49 kg) jarysty ekinshi ainalymnan bastaidy. Ol Matias Namýniela (Namibiia) men Rýfat Hýseinov (Ázerbaijan) arasyndaǵy jekpe-jektiń jeńimpazymen kezdesedi.
Oljas Sáttibaev (52 kg) birinshi ainalymda pýerto-rikolyq Haver Kintrondy jeńse, 2015 jylǵy álem chempiony ázerbaijandyq Elvin Mamishzademen ringke shyǵady. Qairat Eraliev (56 kg) 2013 jyly Almatyda ótken álem chempionatynyń jeńimpazy ázerbaijandyq Javid Chelebievpen kezdesedi. Eraliev Almatydaǵy álem chempionatynyń jartylai finalynda osy boksshydan jeńilgen.
Berik Ábdirahmanov (60 kg) alǵashqy ainalymda amerikalyq Karlos Valderaspen kezdesedi. Abylaihan Júsipov (64 kg) birinshi jekpe-jeginde ulybritaniialyq Pet Makkormakpen saiysqa túsedi. Onyń jeńse, kýbalyq Iasnel Toledomen bokstasady.
Daniiar Eleýsinov (69 kg) jarysty ekinshi ainalymnan bastaidy. Onyń alǵashqy qarsylasy Djosh Kelli (Ulybritaniia) men Ýalid Mohammad (Egipet) arasyndaǵy jekpe-jekte anyqtalady. Jánibek Álimhanuly (75 kg) alǵashqy ainalymda ulybritaniialyq Entoni Foýlermen kezdesedi.
Ádilbek Niiazymbetov (81 kg) ekinshi ainalymda Valentino Manfredonio (Italiia) men Mihail Dolgolevets (Belorýs) arasyndaǵy jekpe-jek jeńimpazymen judyryqtasady. Vasilii Levit (91 kg) ekinshi ainalymda qytailyq Iu Fenkaimen bokstasady.
+91 kilogramm salmaqta Ivan Dychko birinshi ainalymdy attap ótedi. Onyń qarsylasy Magomedrasýl Medjidov (Ázerbaijan) pen Mohamed Ardjoýi (Marokko) arasyndaǵy kezdesýde anyqtalady. Dychko 2013 jyly Almatydaǵy álem chempionatynyń finalynda Medjidovtan nokdaýnmen jeńilgen.
Áielder arasynda Jaina Shekerbekova (51 kg) ekinshi ainalymda marokkolyq Zahra Ez-Zahraýi men frantsiialyq Sara Oýrahmon arasyndaǵy kezdesýdiń jeńimpazymen bokstasady.
Dariǵa Shákimova (75 kg) birinshi ainalymda 2008 jylǵy álem chempiony kanadalyq Ariana Fortinmen ringke shyǵady.
Rio olimpiadasyndaǵy boks jarystary 6-21 tamyz arasynda ótedi.
