Olimpiada álemdik doda bolǵanmen, ár eldiń, ár ulttyń óziniń bir «dástúrli» qarsylasy bolady.
Ádette ol kórshisi nemese týysy.
Sondai qarsylas qazaq elinde de bar. Ol ári kórshi, ári týys ózbekter.
Sonaý 1960 jyldary fýtbol órkendep, eki ulttyń komandalary KSRO chempionatynda óner kórsete bastaǵannan «Qairat» pen «Pahtakor» komandalary arasynda osyndai básekelestik boldy. Eki komandanyń arasyndaǵy oiyndy alystaǵy malshy aýyldaǵy shopandarǵa deiin radioqabyldaǵyshtaryn qulaqtaryna tosyp, eleńdep kútetin. Gazetten oqyp, radiodan estigeni men teledidardan kórgenin qyzý talqylap jatatyn. Ágáráki oiyndy stadionnan kórýdiń sáti tússe, jyldar boiy maqtanyshpen aityp júretin. Ózimiz Qairattyń jankúieri retinde Tashkentke de bardyq, Almatydaǵy birer oiynyn da kórdik. Stadionǵa eń kóp jankúierlerdi osy eki komandanyń arasyndaǵy oiyndar jinaityn. Oiynshylar baryn salatyn. Tipti jankúierler arasynda da kikiljińder oryn alyp turýy qalypty jaǵdai bolatyn .
KSRO kelmeske ketti. Qazaqstan Fýtbol Federatsiiasy biraz jyldan soń ÝEFA-ǵa aýysty. Alǵashynda muny maqtanysh kórgenmen, úlken qatelik bolǵanyn endi túsinip kele jatyrmyz. Sonymen ózbek fýtbolynan alystap kettik. Al oiyn deńgeiimiz Eýropanyń eń sorly komandasynyń deńgeiine de jete almai jatyr.
Qazir sportta eki eldiń arasyndaǵy basty básekelestik boks ringine aýysty!
Eki týys ári kórshi halyqtardyń bokstan álemdik kóshbasshy elderdiń sanatyna kirgeni maqtanysh.
Desek te, ejelgi básekelesten basym túskenge ne jetsin?!
Tóreshi de adam balasy!
Ol da qatelesedi nemese bir sportshyǵa búiregi burýy ábden múmkin pende!
Ári dese, ring bar bolǵany aýdany 6.1h6.1 bolǵanmen, ár tóreshi ózi otyrǵan buryshtan ǵana kóre alady jáne soǵan bailanysty baǵa bere alady.
Sondyqtan, múmkin bolsa, uryp jyqqan durys.
Aitýǵa ońai degenmen, ásirese ózbek aǵaiyndarymyzben oiynda aiqyn, ári taza jeńis qajet.
Boksshylardan ótinish!
Ainalaiyndar, kórshiniń aldynda bizdi jerge qaratpańdar!
Baryn salyp, utyńdarshy!
Ózderińe Jaratqan iemiz jar bolyp, ata-baba arýaǵy qoldasyn!
Ómir Shynybekuly - joǵary sanatty ustaz. Shymkent q.
