Foto: ashyq derekkóz
Qazaqstan kinematografister ligasynyń tóraǵasy Aidar Batalovtyń Máskeýde ótken "TMD-ǵa múshe memleketterdiń Halyqaralyq ekonomikalyq forýmynda" sóilegen sózi qoǵamda qyzý talqylanyp, túrli kózqarasqa sebep boldy, dep habarlaidy Ult.kz.
"Qazaqstan kinematografister ligasynyń tóraǵasy retinde men kún saiyn bizdiń qandai kúrdeli, biraq sonymen qatar múmkindikterge toly kezeńde turǵanymyzdy kórip júrmin. Búgin biz munda tek indýstriiany talqylaý úshin emes, ortaq mádeni kodymyzdyń bolashaǵy týraly sóilesý úshin jinaldyq. Táýelsizdik týraly kóp aitylady. Biraq shyndyqqa týra qaraiyq: kino keńistigimiz bytyrańqy kúide turǵan kezde, biz áli de osal kúidemiz. Meniń de, Liganyń da ustanymy aiqyn: bizge biryńǵai Eýraziialyq distribýtsiialyq keńistikke birigý qajet", - deidi óz sózinde Aidar Batalov.
«Biryńǵai Eýraziialyq distribýtsiialyq keńistikke birigý qajet» degen málimdemesi birqatar qoǵam ókilderiniń synyna ushyrady. Olardyń pikirinshe, mundai bastama eldiń mádeni táýelsizdigine qatysty alańdaýshylyq týdyrady.
Qoǵam belsendisi Qanat Ramazan bul sózderdi «qaýipti signal» dep baǵalap, «qazaq qoǵamynyń pikirin eskermei, eldi ózge mádeni keńistikke kiriktirý durys emes» ekenin aitty.
"Bizden eshteńe suramai, kúlli qazaq halqynyń pikirin kúltabaqqa tastap, siz ben bizdi Reseidiń mádeni keńistigine kirgizip tastap turǵany qalai? Basqasha qalai túsinýge bolady?", - dep suraq qoiady Qanat Ramazan.
Al jýrnalist Karim Qadyrbaevtyń aitýynsha, qazirgi tańda Qazaqstandaǵy kino distribýtsiiasy táýelsiz baǵytta damyp keledi jáne otandyq kompaniialar sheteldik filmderdi óz betinshe sátti naryqqa shyǵaryp otyr.
"2022 jyldyń aqpanyna deiin Gollivýd, sondai-aq eýropalyq jáne aziialyq filmder bizge reseilik distribiýtorlar arqyly keletin. Qazir jergilikti distribiýtorlar sheteldik kinomen ózderi-aq sátti jumys istep jatyr. Batalov nege qaitadan ortaq distribýtsiiany qaitarǵysy keledi?
Shyn máninde, reseilik filmder Qazaqstan kinoteatrlarynda áli de kórsetilip jatyr. Biraq! Olardy kóretin kórermen azaidy. Muny tek óz tájiribemnen emes, tanystarym men dostarymnyń pikirinen jáne kassalyq túsim statistikasynan da baiqaýǵa bolady — qazaqstandyq kórermenniń reseilik kinoǵa qyzyǵýshylyǵy jyl saiyn tómendep keledi. Tipti Gollivýd ónimderine de qyzyǵýshylyq azaiyp jatyr. Qazir basty nazar — ulttyq kinoda. Al bizdiń kinematografiia básekege qabiletti ǵana emes, repertýardy qalyptastyratyn deńgeige jetip jatqanda, Liga áldebir Reseimen «ortaq mádeni keńistik» týraly aityp otyr", - dep jazdy Qadyrbaev.
Osyǵan bailanysty, Liga usynǵan bastama eldegi kino indýstriiasynyń qazirgi damý úrdisterine qanshalyqty sáikes keletini qoǵam talqysyna tústi.
"Sońǵy úsh jylda bizdiń prodiýserler, rejisserler men stsenarister qazaqstandyq kinony el ishindegi prokattyń 80%-dyq úlesine deiin jetkizdi. Bizdiń filmder rekord jańartyp, mádenietimiz ben turmysymyzdy kórsetip júr. Sonda biz «quldyrap bara jatyrmyz» jáne «osalmyz» ekenin solar bilmei me, álde bul tek Máskeýdegi aýditoriiaǵa arnalǵan sizdiń qiialyńyz ba? Sahnadan aityp júrgen «qurydym» degen qandai jaǵdai?", - dep suraq qoiady Aida Musaeva esimdi qoldanýshy.
