RF Prezidenti Vladimir Pýtin Qorǵanys ministri Sergei Shoigýmen bolǵan jinalysta Jeńis paradynyń 24 maýsymda ótetinin jariialady, dep habarlaidy "Ult aqparat" Reseidiń TASS aggenttigine silteme jasap.
«Ekinshi dúniejúzilik soǵystaǵy Jeńistiń 75 jyldyǵyna orai Resei astanasy Máskeý men basqa da qalalarda áskeri paradqa daiyndyqty bastaýdy buiyramyn. Biz ony 24 maýsymda, 1945 jyly Máskeý túbinde soǵysqan jáne Leningradty qorǵaǵan, Eýropany azat etken, Berlindi shabýyldap basyp alǵan maidangerlerdiń Qyzyl alańda júrip ótken kúni, dańqty, tarihi jeńimpazdar parady bolǵan kúni ótkizemiz», - dep buiryq berdi RF Prezidenti.
Pýtin Shoigýǵa paradqa qatysýshylardyń densaýlyǵyna tónetin kez kelgen qaýiptiń aldyn alýdy tapsyrdy.
«Sizge paradty ótkizý jáne oǵan daiyndyq kezinde qatań qaýipsizdik sharalaryn qamtamasyz etýdi buiyramyn. Onyń barlyq qatysýshylaryna tónetin qaýip múmkindiginshe tómen bolýy kerek», - dedi Pýtin.
Prezident mundai sheshimdi eldiń kóptegen óńirlerindegi jáne Qarýly Kúshterdegi jaǵdaidyń juqpaly aýrýdyń taraýy sharyqtaý sheginen ótkeninen soń turaqtaǵanyn eskere otyryp qabyldaǵanyn túsindirdi.
Sondai-aq, ol «osy qiyn ýaqytta áskerde oqý-jattyǵý ótip, Resei qorǵanysyn qamtamasyz etýdegi mańyzdy tapsyrmalar sheshilgenin, osy jyly ásker qataryna shaqyrylǵan azamattardyń qabyldanǵan profilaktikalyq sharalardyń arqasynda infektsiia taralý qaýpinen barynsha qorǵalǵanyn atap ótti.
RF Memleket basshysy paradta kórermenderdiń bolatynyn naqtylamady.
Eske salaiyq, búgin RF prezidenti Vladimir Pýtin Qasym-Jomart Toqaevty 24 maýsym kúni Máskeýde ótetin Jeńis paradyna qurmetti qonaq retinde qatysýǵa shaqyrdy. Qazaqstan Prezidenti shaqyrtýdy rizashylyqpen qabyl aldy.
