Foto: ashyq derekkóz
Reseide qazaqstandyq stendap-komik Nurlan Sabýrovtyń taǵy bir kontserti ótpeitin boldy. Bul týraly ngs55.ru jazdy, dep habarlaidy Ult.kz.
Komik 8 aqpanda Omby qalasynyń G-Drive Arena sahnasynda óner kórsetýi tiis bolǵan. Alaida is-shara biletter satylatyn saittardan jáne Sabýrovtyń resmi saitynan alynyp tastalǵan. Kontsert uiymdastyrýshylardyń bastamasymen toqtatylǵany habarlandy.
Bilet satyp alǵan kórermenderge kontsert ótpeitini jáne qarajattyń qaitarylatyny jóninde habarlamalar jiberilgen. Keibir kórermenderge aqsha qaitarylyp úlgerse, endi birine qarajattyń 180 kún ishinde aýdarylatyny aitylǵan.
«Bul sheshimdi uiymdastyrýshylar qabyldady. Soǵan qaramastan, kóńilińizden shyǵatyn ózge is-shara taýyp, ýaqytty jaqsy ótkizesiz dep úmittenemiz», – delingen uiymdastyrýshylar taratqan habarlamada.
Aita keteiik, 2025 jyldyń jeltoqsanynda Nurlan Sabýrovtyń kontserti Riazan qalasynda da ótpegen. Buǵan deiin Obninsk qalasyndaǵy kontserti de toqtatylǵan edi. BAQ málimetinshe, kontsertterdiń jii keiinge shegerilýine Sabýrovtyń Qazaqstanǵa kóship kelgen reseilikter týraly ázilderi sebep bolýy múmkin. Atap aitqanda, ol orys tildi azamattarǵa qazaq tilin meńgerýdiń qiyndyǵyn ázilmen jetkizgen.
Sondai-aq qarasha aiynyń sońynda Sabýrovtyń Nijnevartovsk pen Ekaterinbýrg qalalaryndaǵy kontsertteri de toqtatylǵan. Artistiń menedjeri bul aqparatty rastap, biletter úshin qarajat tolyq qaitarylatynyn málimdegen.
