Resei koronavirýspen kúres jedel shtabynyń málimetinshe, búgingi kúni 85 óńirdiń tek 8-i ǵana shekteýdiń úshinshi kezeńine kóshken. Reseidiń basqa aimaqtarynda qatań shekteý sharalary saqtalǵan dep habarlaidy QazAqparat.
Kezeńge qaramastan, barlyq aimaqta qoǵamdyq orynda áleýmettik qashyqtyq saqtaý talap etiledi.
Resei Densaýlyq saqtaý ministrliginiń bas infektsionisi, professor Vladimir Chýlanov KVI ekinshi tolqynyna aldyn alý sharalaryn saqtaý – maska taǵý, qoldy jii jýý, áleýmettik qashyqtyq saqtaý jáne naýqastanǵan adamdardyń oqshaýlanýy kedergi bolady dep esepteidi. Sonymen qatar kez kelgen adam kóp jinalǵan jer – virýstyń taralý oshaǵy. Bul týraly RF Densaýlyq saqtaý ministrliginiń baspasóz qyzmeti habarlady.
V.Chýlanovtyń pikirinshe, aldyn alý sharalarynyń arqasynda RF-ǵy jeke sýbektilerdegi koronavirýs indetiniń taralýy azaidy, biraq jaǵdai kez kelgen ýaqytta ózgerýi múmkin.
«Muny bir shaiqastaǵy kishigirim jeńis dep aitýǵa bolady, biraq soǵys áli aiaqtalǵan joq. Biz kúnde jańa virýs juqtyrý oqiǵalaryn tirkep jatyrmyz, kei aimaqtarda indet órship tur, iaǵni infektsiianyń taralý qaýpi saqtalady. Oń ózgeristi saqtap qalý úshin qarapaiym saqtyq erejelerin oryndaý qajet. Onyń negizgisi – qoǵamdyq orynda maska taǵý», - dep atap ótti ol.
Rospotrebnadzordyń dereginshe, qazirgi kúni Reseidiń 85 óńirinde 733 699 virýs juqtyrý oqiǵasy tirkeldi, onyń ishinde 6 537 adamnan virýs sońǵy táýlikte anyqtalǵan. Jalpy infektsiiadan 11 439 naýqas qaitys bolyp, 504 021 adam jazylyp shyqty. Syrqatqa shaldyqqandar sany Máskeý men Sankt-Peterbýrgte kún saiyn ósip jatyr.
Reseide virýs juqtyrǵandar sany boiynsha el astanasy kósh bastap tur. Munda 230 029 adam infektsiia juqtyrǵan.
