Reseidiń syrtqy ister ministrligi britandyq Financial Times jáne amerikalyq The New York Times basylymyna hat joldap, Reseide koronavirýstan qaitys bolǵandar sany týraly málimetti joqqa shyǵarýdy talap etti. Bul týraly sársenbi kúni syrtqy ister ministrliginiń ókili Mariia Zaharova málimdedi. Vedomstvo ókili maqalalardy "joq jerden spekýliatsiia jasaý" jáne Reseidi qaralaýdy kózdeitin "kezekti sensatsiialyq jalǵan aqparat" dep atady.
The New York Times basylymy maqalanyń resmi derek negizinde jasalǵan taldaýǵa súienip jazylǵanyn málimdedi. "Maqalada keltirilgen faktilerge kúmán joq" dedi The New York Times basylymynyń kommýnikatsiia jónindegi vitse-prezidenti Daniel Roads.
Financial Times jáne The New York Times-ta jariialanǵan maqalalarda Máskeý men Sankt-Peterbýrgte koronavirýstan qaitys bolǵandar sany resmi statistikada keltirilgen kórsetkishten 70 paiyzǵa artyq bolýy múmkin ekeni aitylǵan. Eki basylym da sáýir aiyndaǵy adam ólimi týraly resmi málimetti saraptaǵan. Zertteýge sáikes, Máskeýde sońǵy jyldardaǵy ólim kórsetkishimen salystyrǵanda 2020 jyly sáýirde qaitys bolǵandar sany ortasha kórsetkishten shamamen 2 myń adamǵa artyq. Al resmi málimet boiynsha Máskeýde 642 adam koronavirýstan kóz jumǵan.
Máskeý qalalyq densaýlyq saqtaý departamenti sársenbi kúni málimdeme taratyp, aqparat quraldarynda jariialanǵan qaladaǵy adam ólimi kórsetkishi týraly derekti joqqa shyǵarǵan. Málimdemede koronavirýs juqqan patsientter óliminiń shamamen 60 paiyzy resmi statistikaǵa qosylmaityny, sebebi olardyń ólimine ózge aýrýlar sebep bolǵany jazylǵan.
Sońǵy málimet boiynsha, Reseide 252 myńnan astam adamnan koronavirýs tabylǵan, 53 myńnan astam adam jazylǵan. 2305 adam qaitys bolǵan.
