Foto: ashyq derekkóz
Astana qalasyndaǵy №117 sailaý ýchaskesine Qyrǵyz Respýblikasynyń Sailaý jáne referendým ótkizý jónindegi ortalyq komissiiasynyń tóraǵasy Tynchtyk Shainazarov kelip, konstitýtsiialyq referendýmnyń ótý barysymen tanysty, dep habarlaidy Ult.kz.
Sarapshynyń aitýynsha, kez kelgen elde biliktiń negizgi kózi – halyq. Al halyq óz biligin sailaý men referendým arqyly júzege asyrady. Mundai saiasi naýqandarda azamattar óz eliniń bolashaqtaǵy damý baǵytyn qalai kóretinin bildiredi.
Tynchtyk Shainazarov Qazaqstanda ótip jatqan referendýmnyń mańyzdylyǵyna toqtalyp, bul bastama eldiń aldaǵy damýyna áser etetin mańyzdy qadam ekenin aitty. Onyń sózinshe, byltyrǵy jyldyń qyrkúieginde Qazaqstan Prezidenti Qasym-Jomart Toqaev halyqqa Joldaý jasap, konstitýtsiialyq ózgerister máselesin kóterdi. Búginde sol bastamanyń jalǵasy retinde referendým ótip jatyr.
Sarapshy sailaý ýchaskesindegi jaǵdaidy oń baǵalady. Aitýynsha, daýys berýge kelgen azamattardyń belsendiligi jaqsy, adamdardyń kóńil kúii kóterińki.
«Ýchaske mańynda biraz ýaqyt baqylap turdym. Qazirdiń ózinde kelýshilerdiń qarasy jaqsy. Naqty qansha paiyz ekenin aitý qiyn, biraq halyqtyń belsendiligi baiqalady. Eń bastysy – adamdardyń kóńil kúii jaqsy, merekelik atmosfera seziledi. Keshke deiin kútip, qorytyndy nátijelerge qarai tiisti baǵasyn berýge bolady», – dedi ol.
Aita keteiik, Qyrǵyzstannan referendýmdy baqylaý úshin arnaiy delegatsiia kelgen. Tynchtyk Shainazarovtyń aitýynsha, Qazaqstanǵa barlyǵy 18 baiqaýshy jiberilgen. Onyń altaýy Astanaǵa kelse, qalǵan 12-si Qyrǵyzstanmen shektesetin Qazaqstan óńirlerindegi ýchaskelerde baqylaý júrgizip jatyr.
Sonymen qatar ol sailaý ýchaskesiniń tehnikalyq jáne uiymdastyrýshylyq deńgeiine de toqtaldy.
«Ár memlekettiń óz tásili bar. Tehnikalyq jabdyqtalý ártúrli bolýy múmkin. Biraq eń mańyzdysy – azamattardyń erkin daýys berýine múmkindik berý. Búgin bul jerde qupiia daýys berý tolyq qamtamasyz etilgenin kórdik. Adamdardyń shoǵyrlanýy, retsizdik joq, bári jaqsy uiymdastyrylǵan», – dedi .
Sarapshynyń aitýynsha, bul onyń Astanaǵa alǵash ret kelýi. Ol Qazaqstanǵa sapary barysynda referendýmnyń ótý barysyn baqylap, tájiribe almasýǵa múmkindik týǵanyn atap ótti.
