Qyzylorda qalasyndaǵy kópbeiindi oblystyq balalar aýrýhanasynda eki ailyq náreste qaitys boldy. Osy jaǵdaiǵa bailanysty politsiia qylmystyq is qozǵady, dep habarlaidy ult.kz.
Oblystyq Politsiia departamentiniń málimetinshe, is meditsina qyzmetkeriniń óz mindetterin tiisinshe oryndamaýy saldarynan abaisyzda adam ólimine ákep soǵý deregi boiynsha tirkelgen.
Qazir oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri júrgizilip jatyr. Qylmystyq isti tergeý barysy Politsiia departamentiniń baqylaýynda.
Al oblystyq densaýlyq saqtaý basqarmasynyń málimetinshe, náreste jedel járdem brigadasymen kópbeiindi oblystyq balalar aýrýhanasyna jetkizilip, meditsinalyq kómek kórsetilgen.
Basqarmanyń habarlaýynsha, emdeý barysynda Respýblikalyq klinikalyq ortalyq mamandary balaǵa birneshe ret telemeditsinalyq keńes bergen.
Qazir atalǵan jaǵdaiǵa bailanysty tekserý jumystary júrgizilip jatyr. Náresteniń ólimine naqty ne sebep bolǵany tergeý nátijesinde anyqtalmaq.
