2026 jylǵy qańtar–sáýir ailarynyń qorytyndysy boiynsha Qazaqstanda sary mai men kúnbaǵys maiy óndirisiniń turaqty ósimi baiqaldy, dep habarlaidy ult.kz.
QR Ulttyq statistika biýrosynyń málimetinshe, syrtqy saýda kórsetkishteri de oń dinamika kórsetti: ónimniń eki sanaty boiynsha eksport kólemi ulǵaiyp, bul otandyq qaita óńdeý ónerkásibiniń áleýetiniń artyp kele jatqanyn aiǵaqtaidy.
Esepti kezeńde respýblikada mailylyǵy 85% aspaityn 13,8 myń tonna sary mai óndirildi. Bul 2025 jyldyń sáikes kezeńimen salystyrǵanda 47,4% artyq.
Sary mai eksporty 40,4% ósti. 2026 jylǵy qańtar–sáýir aralyǵynda shetelge 394,1 tonna ónim eksporttaldy. Bul ótken jyldyń osy kezeńindegi 280,7 tonnamen salystyrǵanda aitarlyqtai joǵary. Negizgi eksporttyq naryqtar – Resei, Mońǵoliia, Qyrǵyzstan jáne Belarýs.
Sary mai importy 2 242,2 tonnany qurady. Ishki naryqtaǵy importtyq ónimniń úlesi 13,9% boldy. Negizgi jetkizýshiler – Belarýs pen Iran.
Tórt aidyń qorytyndysy boiynsha ishki naryqta 15,7 myń tonna sary mai ótkizildi.
Kúnbaǵys maiy óndirisinde de oń ósim saqtalýda. 2026 jylǵy qańtar–sáýir ailarynda otandyq kásiporyndar 335,5 myń tonna tazartylǵan jáne tazartylmaǵan kúnbaǵys maiyn óndirdi. Bul ótken jyldyń sáikes kezeńimen salystyrǵanda 13,2% kóp.
Kúnbaǵys maiynyń eksporty 49,6% artty. 2026 jylǵy qańtar–sáýir ailarynda eksporttyq jetkizilimderdiń kólemi 353,8 myń tonnany qurady, al ótken jyldyń osy kezeńinde 236,4 myń tonna ónim eksporttalǵan. Negizgi eksport baǵyttary: Ózbekstanǵa – 153,2 myń tonna, Qytaiǵa – 127,2 myń tonna, Aýǵanstanǵa – 38,6 myń tonna, Tájikstanǵa – 27 myń tonna, Iranǵa – 4,9 myń tonna jáne basqa da elder.
Kúnbaǵys maiynyń importy 47,9 myń tonnany qurady. Bul rette ishki naryqtaǵy importtyq ónimniń úlesi tómen deńgeide qalyp, 12,5% qurady. 2026 jylǵy qańtar–sáýir ailarynda Qazaqstannyń ishki naryǵynda 29,7 myń tonna kúnbaǵys maiy ótkizildi.
