Foto: Qarmet
Qarmet kompaniiasynyń Kómir departamenti kásiporyndaryn jańǵyrtý baǵdarlamasy aiasynda shahtalar taý-ken qazbalaryn júrgizýge arnalǵan jańa jerasty tehnikasymen jabdyqtaldy.
Qazirgi ýaqytta «Shahtinsk» shahtasynyń mamandary jetkizýshi kompaniia ókilderimen birlesip jańa KP-21 úńgý kombainyn synaqtan ótkizip jatyr. Jer ústinde baqylaý jinaǵy men synaq jumystary aiaqtalǵannan keiin jabdyq bólshektelip, jer astyna túsirilip, tikelei kenjarda qaita qurastyrylyp ornatylady.
Jańa tehnika daiyndyq qazbalaryn, tonnelder men shtrekterdi júrgizýge arnalǵan. Dál osy joldar arqyly keiin kómir men jabdyqtar tasymaldanyp, shahtanyń jeldetilýi qamtamasyz etiledi. Bul jumystardyń jyldamdyǵy men sapasy jańa óndirý ýchaskelerin ýaqytynda iske qosýǵa tikelei áser etedi.
Jańa kombaindardyń basty ereksheligi — qashyqtan basqarý jáne tsifrlyq monitoring júiesi. Mashina túrli datchiktermen jáne derekterdi berý júiesimen jabdyqtalǵan, sonyń arqasynda onyń jumys parametrlerin naqty ýaqyt rejiminde baqylaýǵa bolady. Jabdyqtyń jai-kúii týraly aqparat Wi-Fi arqyly shahta dispetcheriniń pýltine jiberiledi.
«Jer ústinde otyryp-aq mashinanyń barlyq júiesiniń jumysyn, suiyqtyq deńgeilerin, jumys rejimderin jáne basqa da parametrlerin qashyqtan baqylaýǵa bolady. Qajet bolǵan jaǵdaida protsesti Kómir departamentiniń Dispetcherlik-taldaý ortalyǵynyń mamandary da qadaǵalai alady», — dedi «Shahtinsk» shahtasynyń ótpe jumystary jónindegi bas injeneriniń orynbasary Sergei Solohin.
Foto: Qarmet
Zamanaýi kombain taý jynysyn buzýdy áldeqaida tiimdi ári qaýipsiz etedi. Mashina elektr jetegi bar qýatty keskish jumys organymen jabdyqtalǵan jáne ártúrli qattylyqtaǵy jynystarmen jumys istei alady. Jabdyqtyń qurylymy biiktigi 5,5 metrge deiingi qazbalardy júrgizýge múmkindik beredi. Buzylǵan jynys kiriktirilgen tieý bóligi men konveierlik júie arqyly birden tasymaldaýǵa jiberiledi. Bul jumysshylardyń fizikalyq júktemesin azaityp, qazba júrgizý qarqynyn arttyrady.
«Shahtinsk» shahtasynyń №2 daiyndyq jumystary ýchaskesiniń bastyǵy Rústem Imanovtyń aitýynsha, jańa kombain úńgý jumysyn edáýir jeńildetedi.
«Mashinany paidalaný jáne qyzmet kórsetý yńǵaily. Burynǵy KSP-32 kombainymen salystyrsaq, onda tek qolmen basqarý bolǵan. Al KP-21-de pýlt arqyly qashyqtan basqarý qarastyrylǵan, bul jumysty aitarlyqtai jeńildetedi», — dedi Imanov.
Biyl Qarmet kompaniiasynyń Kómir departamenti KP-21 úlgisindegi segiz úńgý kombainyn alady. 2026 jyly departamenttiń segiz shahtasynda shamamen 45 shaqyrym taý-ken qazbasyn júrgizý josparlanyp otyr. Zamanaýi ótpeli kombaindardy engizý daiyndyq jumystarynyń joǵary qarqynyn saqtaýǵa jáne jerasty kómir óndirýdiń tiimdiligin arttyrýǵa múmkindik beredi.
Foto: Qarmet
