Foto: Gov.kz
Májilis depýtattary arnaýly memlekettik organdardyń qyzmetine qatysty birqatar zańnamalyq aktilerge ózgeris engizetin zań jobasyn birinshi oqylymda maquldady, dep habarlaidy Ult.kz.
Qujatta prezidentke tikelei baǵynatyn qurylym qyzmetkerleriniń balalaryna qatysty jeńildik normasy qarastyrylǵan.
Depýtat Bolat Kerimbektiń aitýynsha, zań jobasy áskeri jáne arnaýly oqý oryndaryna túsý kezinde úmitkerlerdiń upailary teń bolǵan jaǵdaida kimderge basymdyq beriletinin naqtylaýǵa baǵyttalǵan.
Mundai basymdyq jetim balalarǵa, «Altyn belgi» iegerlerine, halyqaralyq olimpiada jeńimpazdaryna jáne basqa da jekelegen sanattaǵy talapkerlerge beriledi. Alaida osy ýaqytqa deiin mundai múmkindik «Arnaýly memlekettik organdar týraly» zańda kórsetilmegen.
Jańa ózgeris dál osy olqylyqtyń ornyn toltyrýdy kózdeidi. Iaǵni arnaýly memlekettik organdar qyzmetkerleriniń balalary da belgili bir jaǵdaida basymdyq alatyn sanatqa engizilýi múmkin.
Aita keteiik, arnaýly memlekettik organdar – prezidentke tikelei baǵynatyn jáne ulttyq qaýipsizdikti qamtamasyz etetin qurylymdar. Olardyń qataryna Ulttyq qaýipsizdik komiteti, Syrtqy barlaý qyzmeti jáne Memlekettik kúzet qyzmeti kiredi.
Depýtattar zań jobasyn birinshi oqylymda qoldady.
