Pavlodar oblysynyń ákimi Ábilqaiyr Sqaqov Ekibastuz qalasyn damytýdyń keshendi jospary aiasynda qandai sharalar iske asatynyn aitty, dep habarlaidy "Ult aqparat".
«Ekibastuzdyń indýstriialyq aimaǵynda jalpy quny 227,5 mlrd teńge bolatyn investitsiialyq jobalar qolǵa alynady. Qazir qalada energiia bloktaryn jańǵyrtý jobasy jedel júrgizilip jatyr. Munyń bári –Prezident Qasym-Jomart Toqaevtyń tapsyrmasy boiynsha biz ázirleitin Ekibastuzdy damytýdyń keshendi josparynyń bir bóligi. Keshendi jospardy ázirleýge táýelsiz mamandar belsendi qatysty. 1,5 myńnan astam usynys qabyldanyp, 100-den astam saraptamalyq keńes ótti. Ótken demalys kúnderi biz biznes-qoǵamdastyqpen, belsendilermen, qoǵam belsendilerimen jáne qalanyń tabysty turǵyndarymen pikir almastyq», - dedi oblys ákimi ortalyq kommýnikatsiialar qyzmetindegi brifingide.
Aimaq basshysy jergilikti ákimdiktiń aldynda qalanyń otyn energetikasyna táýeldiligin azaitý mindeti turǵanyn atady.
«Jospardyń negizgi maqsattarynyń biri – Ekibastuz ekonomikasynyń otyn-energetikalyq keshenge táýeldiligin tómendetý. Ol úshin kómir óndirisin tómendetip, innovatsiialyq tehnologiialarǵa kóshý qajet. Qalanyń ónerkásibinde óńdeý salasynyń úlesin ulǵaitamyz. Bul baǵyttaǵy jobalardy qarjylandyrý úshin biýdjettiń 1 teńgesine jeke investitsiianyń 10 teńgesin tartýdy kózdep otyrmyz», - dedi Ábiqaiyr Sqaqov.
Sondai-aq, oblys ákimi Ekibastuzda jańa baspanalar boi kóteretinin málim etti.
«Keshendi damý jospary qala turǵyndarynyń turǵyn úi, jumyspen qamtý jáne basqa da salalardaǵy kúndelikti problemalaryn sheshedi dep kútip otyrmyz. Qazir Ekibastuzda 5 turǵyn úi salynyp jatyr. Ótken aptada ǵana 5 turǵyn úi qoldanysqa berildi. Bul páterlerdiń bári baspana kezeginde turǵandarǵa tabystaldy. Turǵyn úi qurylysyna da jeke investitsialar tartýdy ózimizge mindet etip qoidyq», - dedi Pavlodar oblysynyń basshysy.
