Biyl Nur-Sultanda jeńildikpen beriletin 10 myń áleýmettik páter turǵyzylady. Tek sońǵy úsh jyldyń ishinde qoljetimdi turǵyn úi sany 5,5 eseden astamǵa ulǵaidy.
Bul týraly Nur-Sultan qalasynyń ákimi Altai Kólginov aityp berdi, dep habarlaidy QazAqparat.
«Qala turǵyndarynyń mańyzdy jáne ózekti máseleleriniń biri – turǵyn úi. Prezident tapsyrmasymen jeńildikti qoljetimdi turǵyn úi qurylysyn arttyrý boiynsha júieli jumys júrgizýdemiz. Mysaly, 2018 jyly 1800 áleýmettik páter, 2019 jyly – 2 900 áleýmettik páter salynsa, 2020 jyly –7 000-nan astam páter salynyp, paidalanýǵa berildi. Biyl bul kórsetkishti 10 myńǵa jetkizýdi josparlap otyrmyz», - dedi Kólginov Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, jaqynda kezekte turǵan áleýmettik osal toptaǵy 400-ge jýyq turǵynǵa páter kiltteri beriledi. Qoljetimdi baspana barlyq aýdandarda salynyp jatyr.
«Odan bólek, turǵyn úi sertifikattarynyń somasy 1 mln teńgeden 1,5 mln teńgege deiin ulǵaityldy, qazaqstandyq turǵyn úi kompaniiasynyń (QIK) baǵdarlamasynda qatysýshylar sanaty keńeitildi: meditsina qyzmetkerleri, pedagogtar, áleýmettik qyzmetkerler, órt sóndirýshiler, tártip saqshylary, mádeniet jáne sport qairatkerleri qatysa alady. Sondai-aq, Elbasynyń bastamasymen qolǵa alynǵan «Jumys isteitin jastarǵa arnalǵan jalǵa beriletin baspana» baǵdarlamasy biyl da jalǵasady. Osy baǵdarlama aiasynda jyl sońyna deiin taǵy myńnan astam jastar baspanaly bolady. Osy myń páterden bólek, biyl jyl basynda 350 jasqa páter kilti tapsyrylǵan bolatyn. Sol siiaqty 2021 jyly jastar úshin arnaiy turǵyn úi baǵdarlamasy iske qosylady», - deidi Kólginov.
