Foto: Aqorda
Qasym-Jomart Toqaev sýmo sportynyń otany Japoniiada zor jetistikke jetken qazaqstandyq balýan Ersin Baltaǵulmen kezdesti, dep habarlaidy Ult.kz.
Prezident sportshynyń byltyr Imperator kýbogynda «maegashira» ataǵyn, iaǵni sýmo balýandarynyń eń joǵary dárejesin ielenip, jarys qorytyndysy boiynsha «Kanto-se» (jaýyngerlik rýh) arnaiy júldesin alýymen quttyqtady.
Qasym-Jomart Toqaev atalǵan júlde tabandylyq pen qajyrly eńbektiń jemisi ekenine toqtaldy.
Sondai-aq búginde shet memleketterde elimizdi álemge tanytyp júrgen jastarymyzdyń kóbeiip kele jatqanyn, memlekettiń talanttar men sportty qoldaýǵa erekshe kóńil bóletinin atap ótti.
– Japoniiaǵa barǵan saparymda sizdi Imperatordan bastap qarapaiym halyqqa deiin bári tanitynyn, qurmetteitinin baiqadym. Bul – zor mártebe. Japoniiada tursańyz da qazaqtyń atyn shyǵaryp, elimizdiń bedelin biiktetip júrsiz. Sizge erekshe rizashylyǵymdy bildiremin, – dedi Memleket basshysy.
Ersin Baltaǵul Prezidentke iltipat kórsetkeni úshin rizashylyǵyn bildirip, elimizdiń jas sportshylarymen kezdesýdi josparlap otyrǵanyn jetkizdi.
– Qazaqstannyń azamaty retinde maqsatymyz elimizdiń kók týyn 120 millionnan asa halqy bar Japoniiaǵa tanytý bolatyn. Osy baǵyttan taimai, eńbek etip kelemiz. Sondai-aq Italiiadaǵy Qysqy Olimpiada oiyndarynda altyn medal ielengen otandasymyz Mihail Shaidorovtyń aitýly jetistigimen Ózińizdi jáne barsha qazaqstandyqtardy quttyqtaimyn, – dedi Ersin Baltaǵul.
Kezdesý sońynda Qasym-Jomart Toqaev balýanǵa aldaǵy ýaqytta da halyqaralyq jarystarda joǵary nátijelerge qol jetkizip, el abyroiyn asqaqtatýǵa jáne Qazaqstan men Japoniia arasyndaǵy dostyqty nyǵaitýǵa úles qosa berýine tilektestik bildirdi.
Prezident sport salasyndaǵy eleýli eńbegi úshin sýmoshy Ersin Baltaǵuldy II dárejeli «Barys» ordenimen marapattady.
