Foto: Aqorda
Memleket basshysy Qasym-Jomart Toqaev ǵalymdardy marapattaý rásiminde sóz sóiledi, dep habarlaidy Ult.kz.
Qasym-Jomart Toqaev Ǵylym qyzmetkerleri kúnimen quttyqtap, mereke qarsańynda Aqordaǵa jinalyp, bas qosý jaqsy dástúrge ainalǵanyn atap ótti.
"Bul – elimizdiń ǵalymdar qaýymyna degen erekshe qurmeti jáne airyqsha yqylasynyń kórinisi. Sebebi kez kelgen damyǵan, iaǵni, ozyq memlekettiń qazyǵy – ǵylym, al qazynasy – ǵalym", - dedi ol.
Prezident ǵylymǵa kórsetilip jatqan júieli qoldaý sharalaryna toqtaldy.
«Keiingi 5 jylda osy salaǵa bólinetin qarjy kólemi 6 eseden asty. Qazaqstanda zertteý ýniversitetteriniń sany kóbeiýde. Ǵylymi jobalarǵa investitsiia salatyn biznes ókilderine salyq jeńildigi beriletin boldy.
Aldymyzda taǵy bir mańyzdy mindet tur. Biz jas ǵalymdar ǵylymmen alańsyz ainalysýy úshin qolaily jaǵdai jasaýymyz qajet. Óitkeni qazaq ǵylymynyń bolashaǵy – kózi ashyq, kókiregi oiaý, oiy ushqyr jáne maqsaty biik jastardyń qolynda", - dedi ol.
Prezident qazirgi tańda 600-den astam jas ǵalymǵa baspana berilip, arnaýly granttar bólingenin atap ótti.
"Taǵy bir másele. Ǵylymnyń áleýetin el igiligine jarata bilý qajet. Ǵalymdarymyz ashqan jańalyqtar zerthanalar aiasynda qalyp qoimaýy kerek. Naqty nátije beretin, óndiriske engizýge bolatyn jobalardy júzege asyrý qajet. Bir sózben, ǵylym ekonomika men qoǵamnyń suranysyna sai bolýǵa tiis. Bul maqsat Úkimettiń udaiy nazarynda bolýy kerek, sebebi osy mindettiń elimiz úshin mán-maǵynasy erekshe", - dedi ol.
