Aqordada Qazaqstan Respýblikasynyń Prezidenti Qasym-Jomart Toqaev «Qurmet» ordeniniń iegerlerin marapattady, dep habarlaidy QazAqparat.
«Eń jas halyqaralyq grossmeister, shahmatshy Jansaia Ábdimálik pen belgili opera ánshisi Zarina Altynbaeva «Qurmet« ordenimen marapattaldy. Belgili telejúrgizýshiler, jýrnalister Zeiin Álipbek pen Vera Zaharchýkke de «Qurmet« ordeni beriledi», - dedi Qasym-Jomart Toqaev memlekettik nagradalardy tabystaý rásiminde.
Sondai-aq, «Qurmet» ordenimen Pavlodar qalasynyń daryndy balalarǵa arnalǵan gimnaziiasynyń direktory Qorlan Quspekova, Kókshetaý qalasynyń kópsalaly aýrýhanasy nevrologiia bóliminiń meńgerýshisi Maqshárip Martazanov, Almaty qalasyndaǵy ekinshi klinikalyq aýrýhanasynyń bas dárigeri, joǵary bilikti neirohirýrg Marat Rabandiiarov marapattalady.
«Olar eń mańyzdy mamandyqtardyń – muǵalimder men dárigerlerdiń jarqyn ókilderi. Olar ózderiniń kásibiligimen jáne jasampaz eńbekterimen gýmanitarlyq áleýetti arttyrady jáne ult densaýlyǵyn nyǵaitady», - dedi Prezident.
Sonymen birge, «Kókshetaý qalasy joǵary tehnikalyq kolledji» MKQK jetekshisi Aqnur Eslámova, Shymkent qalasynan kelgen eńbek ardageri Baian Jandosova, SQO qiyn jaǵdaiǵa ushyraǵan balalardy qoldaý ortalyǵynyń direktory Elemes Qaliev jáne Qyzylorda oblysy Qazaqstan sýretshiler odaǵynyń tóraǵasy Amangeldi Kenenbaev Prezident qolynan «Parasat» ordenin aldy.
