Foto: Aqorda
Memleket basshysy HIV Qysqy Paralimpiada oiyndarynyń chempiony Erbol Hamitovty marapattady, - dep habarlaidy Aqorda.
Aqordada HIV Qysqy Paralimpiada oiyndarynyń chempiony Erbol Hamitov pen onyń bapkerlerin marapattaý rásimi ótti.
Qasym-Jomart Toqaev Italiiada ótken álemdik doda elimiz úshin óte tabysty bolǵanyna toqtaldy. Jahandyq básekede otandasymyz Erbol Hamitov altyn jáne qola medal jeńip aldy.
"Naǵyz chempion atanyp, elimizdiń mereiin ústem etti, kók Týymyzdy biikte jelbiretti. Bul – qazaq parasporty úshin tarihi jetistik. Erbol qazaqtyń qaisar, ór rýhty ári namysty ult ekenin kúlli álemge pash etti. Sondyqtan, eń aldymen, saǵan jáne bapkerlerge shynaiy rizashylyǵymdy bildiremin. Paralimpiada oiyndaryna attanar sátte men elimizdiń kók Týyn saǵan tabystadym. Sol artylǵan senimdi tolyq aqtap, Qazaqstanǵa jeńispen oraldyń. Keremet nátijege jettiń! Sonyń arqasynda elimiz komandalyq esepte 18-shi orynǵa taban tiredi. Úzdikterdiń ishinen alǵa shyǵyp, chempion bolý ońai emes. Bul – jyldar boiǵy tynymsyz daiyndyq pen qajyrly ári tabandy eńbektiń jemisi ekeni anyq", – dedi Prezident.
Prezident bapkerlerge, demeýshilerge, dárigerlerge jáne parasportshylarmen jumys isteitin barsha mamanǵa rizashylyǵyn bildirdi.
Memleket basshysy Erbol Hamitovtyń jetistikke jetý jolynda onyń bapkerleri airyqsha ról atqarǵanyna nazar aýdardy.
"Sizder Erbol Hamitovqa bilgenderińizdi úiretip, tájiribelerińizben bólistińizder. Onyń chempionǵa tán tabandylyq tanytyp, biik maqsatqa umtylatyn kúresker minezin shyńdadyńyzdar. Olimpiada jylnamasyna esimin jazǵan belgili, kórnekti sportshy bolýyna kúsh saldyńyzdar. Sizderge alǵys aitamyn. Oraily sátti paidalanyp, bapkerlerge, demeýshilerge, dárigerlerge jáne parasportshylarmen jumys isteitin barsha mamanǵa rizashylyǵymdy jetkizgim keledi. Atletterimizdiń jetistigi – óskeleń urpaqqa úlgi-ónege. Tabysqa jetý formýlasyn bári biledi. Alaida asqaq muratqa qol jetkizý úshin kóptegen igilikten jáne ómirdiń qyzyǵynan bas tartyp, qiyn joldy eńserýge ekiniń biri táýekel etpeidi. Álem birinshilikterinde jeńip alǵan ár medal elimizdegi buqaralyq sporttyń damýyna zor serpin beredi. Bul óte mańyzdy. Óitkeni sportpen shuǵyldanatyn, óz-ózin qamshylap, kún saiyn shyńdaityn, sondai-aq temirdei tártipke úirengen adamdar tirshiliktiń taýqymetine moiymaitynyn ómirdiń ózi kórsetip otyr. Bul rette paralimpiadashylardyń jóni tipten bólek. Olardyń ómiri – naǵyz erliktiń, qaitpas qaisarlyq pen muqalmas erik-jigerdiń úlgisi", – dedi Qasym-Jomart Toqaev.
