Foto: Aqorda
Memleket basshysy Qasym-Jomart Toqaev Túrkistan qalasyna jumys saparymen baryp, óńirdiń tarihi mańyzy men damý qarqynyna toqtaldy dep habarlaidy Ult.kz.
«Búgin atajurtymyzdyń altyn besigi – Túrkistan shaharyna taǵzym etý úshin arnaiy kelip otyrmyn. Rizamyn.
Meniń Túrkistanǵa yqylasym erekshe ekenin jaqsy bilesizder. Memleket basshysy retinde alǵashqy saparymdy osy ólkeden bastadym. Túrkistan – túbi bir túrki jurtynyń qasietti shańyraǵy.
Bul – halqymyzdyń bolmys-bitimi, qaisar rýhy, teńdessiz mádenieti jáne eldik dástúri kórinis tapqan kieli jer. Áigili Qoja Ahmet Iasaýidiń mol murasy – shejireli shahardyń rýhani qazynasy.
Áziret Sultan kesenesi – túrki áleminiń berekeli tutastyǵynyń simvoly. Tól tarihymyzda esimi altyn árippen jazylǵan tuǵyrly tulǵalarymyz osy jerde máńgilik mekenin tapqan», - dep atap ótti Qasym-Jomart Toqaev.
Prezident mamyr aiynyń ortasynda Túrkistanda Túrki memleketteri uiymynyń aiasyndaǵy tiisti memleketter basshylarynyń eń joǵary deńgeidegi jiyny josparlanyp otyrǵanyn aitty. Úkimet pen ákimdikke osy jiyndy minsiz uiymdastyrýǵa tapsyrma berdi.
Prezident Túrkistan oblysynyń damý qarqynyn joǵary baǵalady.
«Bir jyl buryn Túrkistan qalasynyń erekshe mártebesi týraly arnaiy Zań qabyldadyq. Byltyr aimaq ekonomikasy 14 paiyzǵa ósti. Barlyq salada jaqsy kórsetkishter paida bolyp jatyr. Salyq túsimi alǵash ret 1 trillion teńgeden asty. Aimaqqa 1,7 trillion teńge investitsiia tartyldy», - dedi Prezident.
Qasym-Jomart Toqaev oblysta salynyp jatqan bý-gaz qondyrǵysynyń qurylysyn tezdetýdi tapsyrdy.
«Jalpy, aimaqta túrli óndiris kásiporyndary ashylyp, júzdegen adam birtindep jumyspen qamtylyp jatyr. Munyń bári de – el ishinde bolyp jatqan naqty jumystyń kórinisi. Óńirlerdiń ekonomikasyn nyǵaityp, halyqtyń ál-aýqatyn jaqsartý memlekettiń basty nazarynda turatyn strategiialyq maqsat bolyp qala bermek», - dedi ol.
