Memleket basshysy Qasym-Jomart Toqaev qazaqstandyqtardy Oraza ait merekesimen quttyqtady, dep habarlaidy "Ult aqparat" Aqordanyń baspasóz qyzmetine silteme jasap.
«Ardaqty aǵaiyn!
Barshańyzdy Oraza ait merekesimen shyn júrekten quttyqtaimyn!
Rýhani tazarý men jańarýǵa jol ashatyn osy qasietti meiram kúlli musylman qaýymy úshin airyqsha mańyzdy.
Ramazan aiyna jalǵasqan bul jarqyn mereke qasterli dinimizdegi meiirim men shapaǵat, janashyrlyq pen qamqorlyq siiaqty asyl qundylyqtardy dáripteidi.
Oraza ait ár adamnyń júregine iman nuryn seýip, izgilikke úndeidi, jurtty jaqsylyqqa jetelep, qoǵamdy igi isterge jumyldyrady. Sol arqyly halqymyzdyń bereke-birligin nyǵaityp, yrys-yntymaǵyn arttyrady.
Barshamyz aittan aitqa aman-esen jete bereiik!
Sizderge zor densaýlyq, baq-bereke tileimin!
Ár shańyraq shýaqqa bólenip, qýanyshqa kenelsin!
Oraza ait qutty bolsyn!», delingen quttyqtaýda.
