Foto: Aqorda
Aqordada áigili alpinist Ervand Ilinskiige joǵary dárejeli erekshelik belgisi – «Qazaqstannyń Eńbek Eri» ataǵyn saltanatty túrde tabystaý rásimi ótti, dep habarlaidy Ult.kz.
Memleket basshysy Qazaqstan men álem alpinizminde aty ańyzǵa ainalǵan tulǵamen júzdeskenine qýanyshty ekenin jetkizdi.
– Ózińizdiń zor qajyr-qairatyńyz ben asa joǵary kásibiligińizdiń arqasynda Qazaqstan Respýblikasynyń kók Týy Jer sharynyń asý bermes asqarlarynda jelbiredi. Álemniń eń biik núktelerin baǵyndyrǵan tájiribeli shyńǵa órmeleýshi, halyqaralyq týrnirlerdiń jeńimpazy retinde dúnie júzine dańqyńyz jaiyldy. Everestke shyǵyp, bedeldi «Jeti shyń» klýbyna múshe bolǵan alǵashqy qazaqstandyq atandyńyz. Sizdi elimizde alpinizm mektebiniń negizin qalaýshy retinde qurmetteidi. Otandyq mektep Qazaqstannyń jahandyq brendine ainaldy. Sizden bir shoǵyr alpinist-sportshylar tálim aldy. Olardyń qatarynda álem rekordyn jańartqan, chempion atanǵan, halyqaralyq alpinizm qozǵalysynyń elitasyna kirgen myqtylar barshylyq, – dedi Prezident.
Qasym-Jomart Toqaev Ervand Tihonovichtiń asyl qasietteri men adamdarǵa, ásirese, alpinisterge degen shynaiy qamqorlyǵyn joǵary baǵalady.
– Qurmetti Ervand Tihonovich Ilinskii siiaqty azamattar – qoǵamnyń tiregi, erlik pen eńbekqorlyqtyń, tózimdiliktiń jarqyn úlgisi. Sondyqtan men sizge alpinizmdegi asa úzdik jetistikterińiz, sondai-aq el sportynyń damýyna qosqan eleýli úlesińiz jáne belsendi qoǵamdyq qyzmetińiz úshin joǵary erekshelik belgisi – «Qazaqstannyń Eńbek Eri» ataǵyn berý týraly sheshim qabyldadym. Búgin osy nagradany ózińizge zor qurmetpen tapsyramyn. Ervand Tihonovich, sizge myqty densaýlyq, baq-bereke, mol tabys tileimin! Alpinister arasynda «Ózińizdi saqtańyz!» degen sóz jii aitylady. Sizge jáne janyńyzda júrip, serik bolǵan shákirtterińizge osy tilekti arnaǵym keledi, – dedi Qasym-Jomart Toqaev.
Ervand Ilinskii atqarǵan qyzmetine joǵary baǵa berip, otandyq alpinizmge airyqsha kóńil bólgeni úshin Qasym-Jomart Toqaevqa alǵys aitty.
– Muny Qazaqstan alpinister qaýymy jetken jetistikterdiń memleket deńgeiinde tanylýy dep túsinemin. Shyn máninde, bizdiń tabysymyzdy sheteldik alpinister de moiyndaidy. Osyǵan kýá bolǵanyma qýanyshtymyn, – dedi ulttyq quramanyń tálimgeri.
