Foto: Aqorda
Memleket basshysy Qasym-Jomart Toqaev Ǵylym jáne joǵary bilim ministri Saiasat Nurbekti qabyldap, saladaǵy negizgi baǵyttar men strategiialyq bastamalardyń júzege asý barysyn tyńdady, dep habarlaidy Ult.kz.
Kezdesý barysynda ministr jańa Konstitýtsiianyń bilim jáne ǵylym salalaryna beretin múmkindikteri týraly baiandap, adam kapitalyn damytýǵa baǵyttalǵan ekojúie qurý jáne talanttardy úzdiksiz qoldaý tetikterin tanystyrdy. Sondai-aq eńbek naryǵyn zertteý nátijeleri men 2030 jylǵa deiingi mamandarǵa degen suranys boljamy usynyldy.
Joǵary bilimniń qoljetimdiligin arttyrý máselesine erekshe nazar aýdaryldy. Onyń ishinde «Keleshek» mehanizmi men salany qarjylandyrýdyń jańa modelin engizý josparlary aityldy. Sonymen qatar AI-Sana ulttyq qozǵalysyn damytý jáne AI-Enabled University indýstriialyq ýniversitetin iske qosý bastamalary tanystyryldy.
Jańa formattaǵy bul joba bilim berý jáne óndiris úderisterine jasandy intellektini keńinen engizýdi kózdeidi. Budan bólek, innovatsiialyq klasterler men ǵylym qalashyqtaryn qurý, DeepTech jáne kúrdeli óndiristerdi damytý modeline kóshý baǵytyndaǵy jumystar da jalǵasyp jatyr.
Ministrdiń aitýynsha, bul baǵytta joǵary oqý oryndary men óńirlik ákimdikterdiń ózara bailanysy mańyzdy ról atqarady. Atalǵan tetikter ǵylymi-zertteý jáne tájiribelik-konstrýktorlyq jumystardy damytýǵa, jańa óndiristerdi iske qosýǵa múmkindik beredi.
Qazirgi tańda ǵylymi saiasatty jetildirýge baǵyttalǵan reformalar jalǵasýda. Ǵalymdardy qoldaý, granttar men syilyqtar bólý, ǵylymi taǵylymdamalar uiymdastyrý jáne jas ǵalymdardy turǵyn úimen qamtamasyz etý máseleleri de nazarda.
Kezdesý qorytyndysy boiynsha Memleket basshysy joǵary bilim sapasyn arttyrý, ǵylymi zertteýlerdi damytý jáne olardy kommertsiialandyrý, innovatsiialyq qyzmetti yntalandyrý, sondai-aq infraqurylym men sheteldik ýniversitetter filialdarynyń jumysyn jetildirý boiynsha birqatar naqty tapsyrma berdi.
