QR Prezidenti Qasym-Jomart Toqaev Qarjylyq monitoring agenttiginiń tóraǵasy Janat Elimanovty qabyldady, dep habarlaidy "Ult aqparat" Aqordaǵa silteme jasap.
Memleket basshysyna «kóleńkeli» ekonomika deńgeiin qysqartý baǵytynda júrgizilip jatqan jumystar týraly málimet berildi. Atalǵan mindet júieli ári keshendi aldyn alý sharalaryn ázirleý jáne ótkizý arqyly júzege asyrylýda.
Janat Elimanov Qasym-Jomart Toqaevqa búginge deiin 2,8 trillion teńge kóleminde jalǵan shot-faktýralar jazyp berýmen ainalysqan 87 qylmystyq toptyń joly kesilgenin baiandady. Qabyldanǵan sharalardyń nátijesinde zańdy tulǵalardyń qolma-qol aqshaǵa ainaldyrǵan qarjy kólemin 24 paiyzǵa azaitý múmkin boldy. Budan bólek jasyryn jumys istegen 10 tsehtyń qyzmeti toqtatylyp, esepte joq 800 myń shólmekten astam alkogol ónimi tárkilendi. Sondai-aq 96 zańsyz oiyn mekemesi joiylyp, zańsyz ainalymnan 1200-den astam oiyn avtomattary, terminaldar men poker ústelderi alyndy. Munai jáne munai ónimderi boiynsha 40 zańsyz ainalym deregi anyqtaldy.
Memleket basshysy «Aiqyn ekonomika» ulttyq jobasyn iske qosý týraly bastamany qoldady. Qarjy salasynyń ashyqtyǵyn qamtamasyz etý, shaǵyn jáne orta biznestiń «kóleńkeli sektordan» shyǵýyn yntalandyrý atalǵan bastamanyń strategiialyq basymdyǵy bolyp tabylady.
Agenttik tóraǵasynyń aitýynsha, 2021-2022 jyldary Qazaqstannyń jylystatýǵa qarsy júiesi qylmystyq jolmen túsken tabystardy zańdastyrýǵa jáne terrorizmdi qarjylandyrýǵa qarsy is-qimyl salasyndaǵy FATF (Aqshany jylystatýǵa qarsy kúrestiń qarjylyq sharalaryn ázirleý toby) standarttarynyń saqtalýy boiynsha ózara baǵalaýdan ótýi tiis.
Prezident Agenttiktiń atalǵan sharaǵa qatysty júrgizip jatqan daiyndyq jumystarynyń mańyzdy ekenin atap ótti jáne kezdesý qorytyndysy boiynsha birqatar naqty tapsyrma berdi.
