Foto: ashyq derekkóz
Astanada politsiia qyzmetkerlerine kúsh qoldanǵan er adamǵa qatysty sot úkimi shyqty. Bul týraly qalalyq prokýratýranyń baspasóz qyzmeti habarlady.
Oqiǵa elordadaǵy turǵyn úilerdiń biriniń aýlasynda bolǵan. Alkogoldik masań kúidegi azamat politsiia qyzmetkerleriniń zańdy talaptaryna baǵynbai, olarǵa balaǵat sózder aityp, ar-namysy men qadir-qasietin qorlaǵan. Buǵan qosa, qarsylyq tanytyp, kúsh qoldanǵan.
Quqyqqa qarsy áreketter saldarynan politsiia qyzmetkerleri densaýlyqqa ziian keltirmeitin dene jaraqatyn alǵan.
Sot barysynda memlekettik aiyptaýshy aiyptalýshynyń kinásin tolyq dáleldeitin jetkilikti aiǵaqtar usyndy. Sottalýshy óz kinásin tolyq moiyndap, jasaǵan isine ókinetinin aitty.
Sot úkimimen ol kináli dep tanylyp, 3 jyl merzimge bas bostandyǵynan aiyryldy. Úkim zańdy kúshine engen.
Qala prokýratýrasy bilik ókilderin qorlaý jáne quqyq qorǵaý organdary qyzmetkerlerine qarsy kúsh qoldaný qylmystyq jaýapkershilikke ákeletinin eske salyp, azamattardy zań talaptaryn saqtaýǵa shaqyrdy.
Aita keteiik, buǵan deiin Óskemende politseidiń qarýyn tartyp alyp, oq atqan kúdiktiler ustalǵan edi. Sondai-aq IIM orynbasary Sanjar Ádilov politsiiaǵa shabýyl jasaý derekterine qatysty pikir bildirgen bolatyn.
