Petropavlda eki páterlik jeke turǵyn úi órtenip, eki adam kóz jumdy, dep habarlaidy "Ult aqparat".
Órt sóndirýshilerdiń aitýynsha, 7 shilde kúni saǵat 8.59 minýt ketkende 101 pýltine Petropavldaǵy Fýrmanov kóshesindegi 73-úidiń janyp jatqandyǵy jóninde habarlama tústi.
«Órt sóndirýshiler sanaýly minýtta jetti. Olar kelgen kezde eki páterli jeke úidiń bir páteri janyp jatqan. Shamamen 10 minýttan keiin mamandar órt ornynan eki adamnyń denesin tapty», - deidi Petropavl qalalyq tótenshe jaǵdailar basqarmasy bastyǵynyń mindetin atqarýshy Ázimhan Merǵasymov.
Qaza tapqandardyń bireýi 1944 jyly týǵan er adam, ekinshisi 1985 jylǵy áiel.
«Kórshileri úide taǵy 15 jastaǵy er bala jáne 14 jastaǵy qyzdyń bolýy múmkindigin aitty. Olar aman, órt bastalǵan kezde úiden ózdiginen shyqqan eken. Sondai-aq kórshileri sol kúni tańǵy saǵat 6.00 kezinde úi ieleriniń janǵan tósek-oryndy sóndirgenin aitty. Órttiń shyǵýyna sóndirilmegen temeki tuqyly sebep bolýy múmkin», - deidi Ázimhan Merǵasymov.
77 jastaǵy er adam ózdiginen qozǵala almaityn múgedek bolǵan, iaǵni ol tósekte otyryp shylym shege bergen. Bul joly onyń temekisiniń shoǵy tósekke túsýi múmkin.
«Olar tósek-oryndy sóndirdik dep úidiń kireberisine kirgizgen. Órt sol jerden shyqqan. Qazir kórshilerine keltirilgen jáne jalpy shyǵyn mólsheri eseptelip jatyr. Eki páterlik úidiń ekinshisin jóndep, qalypqa keltirýge bolady. Bul úi osymen ekinshi ret órtenip otyr. 2015 jyly shatyry janǵan edi, ol joly órt peshten shyqty», - deidi basqarma bastyǵynyń mindetin atqarýshy Ázimhan Merǵasymov.
