Petropavl halyqaralyq áýejaiynyń 109 jumysshysy 27,3 mln teńge eńbekaqysyn ala almai júr, dep habarlaidy "Ult aqparat".
«Petropavl halyqaralyq áýejaiy» AQ daǵdarystan shyǵar emes. Soltústik Qazaqstan kólik prokýratýrasynyń málimetinshe, 2020 jyldyń 28 jeltoqsanynda áýejai mamandandyrylǵan aýdanaralyq ekonomikalyq sotynyń úkimimen bankrot dep tanyldy. Biyl 13 sáýirde sot úkimi zańdy kúshine endi.
«Búginde Petropavl halyqaralyq áýejaiyn oblys ákimdiginiń kommýnaldyq menshigine ótkizý rásimi júrgizilip jatyr. SQO boiynsha memlekettik kirister departamentiniń 2020 jylǵy 30 jeltoqsandaǵy №125 buiryǵymen bankrottyqty basqarýshy taǵaiyndaldy. Bankrottyqty basqarýshy taǵaiyndalýymen kásiporynnyń keibir múlkine baǵalaý júrgizilip, 44 mln teńge somasynda boljamdy quny belgilendi. Oblys máslihatynyń sheshimimen sonsha aqsha bólindi. Bul qarajat áýejai jumysshylarynyń eńbekaqy boiynsha qaryzyn jabýǵa jumsalady», - deidi Soltústik Qazaqstan kólik prokýrory Abylaibek Ordabaev.
Eńbekaqy boiynsha qaryz máselesi burynnan bar. SQO ákimi Qumar Aqsaqalovtyń kómegimen ótken jyldyń qazan aiynan beri 8 transh júrgizilip, qaryzdyń 44 154 251 teńge somasy ótelgen. Qazir áýejaidyń 109 jumysshysynyń qaryzy 27,3 mln teńgeni qurap otyr.
«Biz kólik kásiporyndarynda eńbek zańnamasynyń saqtalýyna únemi monitoring júrgizemiz. Áýejaidyń ujymymen kezdesý uiymdastyryldy. Jumysshylarǵa áýejaidyń qarjylyq jaǵdaiy, nysannyń ákimdiktiń kommýnaldyq menshigine ótetini túsindirildi. Qazirgi ýaqytta áýejaidyń azamattarǵa qyzmet kórsetýi toqtatylýyna bailanysty shaǵymdar men aryzdar joq. Áleýmettik jaǵdai birqalypty», - deidi Abylaibek Ordabaev.
