Óńirlik kommýnikatsiialar qyzmetinde dezinsektsiialyq jumystardyń aralyq qorytyndysy sóz boldy, dep habarlaidy Pavlodarnews.kz saity.
Oblystyq jer qoinaýyn paidalaný, qorshaǵan orta jáne sý resýrstary basqarmasynyń basshysy Qadyljan Sátiev málim etkendei, ǵylymi toptyń usynysy boiynsha qansorǵysh jándikterdiń dernásilderin ýlaý jumystary 1 mamyrda bastalǵan.
- Búgingi kúni «Baktitsid» biopreparatynyń 62 tonnasy, himiialyq preparattyń 1907 litri paidalanyldy, - dedi Qadyljan Sátiev. – Óńdelgen alqaptyń aýdany 26 myń gektardan asty. Barlyq jumystar jer qoinaýyn paidalaný basqarmasy, ǵylymi top pen arnaiy qurylǵan jumys tobynyń qadaǵalaýymen júrgizilýde.
Sheneýnik oblystaǵy shybyn-shirkeidiń taralýyna qatysty jaǵdaiǵa baǵa berýden bas tartqanymen, olardyń biyl kóptigin moiyndady. Onyń sebebi retinde Qadyljan Sátiev biylǵy Ertis ózenindegi tabiǵi sý jiberý merziminiń kesh bastalǵanyn alǵa tartty.
- Qalai bolǵanmen jumysymyzǵa halyq óz baǵasyn bere jatar, biz qolymyzdan kelgenin jasap jatyrmyz, - dedi Qadyljan Sátiev. – 28 mamyrdan bastap qaladaǵy saiabaqtardy qolǵa aldyq. Merdiger qosymsha 2-3 brigadany kómekke aldy. Jumys jalǵasýda.
«TEK.A.TEK.kz» JShS-iń ǵylymi tobynyń jetekshisi Dáýlet Ibraev aityp ótkendei, búginde masa men shirkeidiń dernásiline qarsy jumys aiaqtalýǵa jaqyn. Ǵylymi toptyń boljamynsha jaqynda jaǵdai jaqsarmaq.
