«Nurly Jol» infraqurylymdy damytý memlekettik baǵdarlamasyna sáikes biyl Shyǵys Qazaqstan oblysynda «RF shekarasy (Omby) - Maiqapshaǵai» avtojolynyń Pavlodar oblysynyń shekarasynan Semei qalasyna deiingi ýchaskede (587-733 shaqyrym) aqyly júie iske qosylady.
Memlekettik baǵdarlamany júzege asyrý josparynyń negizinde, Qazaqstan Respýblikasynyń Indýstriia jáne infraqurylymdyq damý ministrligi men «QazAvtoJol» UK» AQ birlesip tólem alýdyń «ashyq júiesin» engizý týraly sheshim qabyldady, dep habarlaidy "Ult aqparat" «QazAvtoJol» UK» AQ baspasóz qyzmetine silteme jasap.
Júieniń ereksheligi – ýchaskelerde shlagbaýmdar bolmaidy. Avtokólikterdiń júrip ótken joly týraly aqparat arkalarda ornalasqan arnaiy kameralar arqyly tirkeledi.
Pavlodar – Semei ýchaskesi II tehnikalyq sanattaǵy avtojol bolǵandyqtan, tek júk kólikterden ǵana tólem alynatyn bolady.
Aqyly ýchaske boiynsha jol aqysyn ekinshi deńgeidegi bankter (Kaspi, hoýmbank jáne t.b. siiaqty internet-banking qosymshalaryn qosa sanaǵanda), tólem terminaldary (Qiwi, woopay), sondai-aq Ksell, Aktiv, Bilain mobildi bailanys operatorlarymen SSID kod jiberý arqyly tóleýge bolady. Jalpy avtokóliktiń jeke shotyn toltyrýdyń 20-dan astam tásili bar. Tolyq aqparat qaj.kz saitynda jariialanǵan.
Sondai-aq, júrgizýshiler men jolaýshylardyń qolailyǵy úshin mamandar KAJ Mobail atty mobildik qosymshany jasap shyǵardy. Búginde, bul qosymsha arqyly jeke shottaǵy qarajatty, júrip ótken jol týraly aqparatty bilýge bolady. Keri bailanys ta bar.
Aldaǵy ýaqytta A pýnktinen B pýnktine deiingi marshrýtty esepteý (uzyndyǵy men baǵasy) jol boiyndaǵy barlyq servis nysandary kórsetilgen interaktivti karta men PUSH habarlandyrýlar da iske qosylady.
Aqyly ýchaskege qatysty barlyq máseleler boiynsha paidaly aqparat berý úshin Semei qalasynyń shyǵaberisinde klienttermen jumys isteý ortalyǵy iske qosylady. Sondai-aq, 1403 nómirindegi bailanys ortalyǵyna da habarlasýǵa bolady.
