Aqsý qalasynyń ákimi bolyp Janat Shuǵaev taǵaiyndaldy. Buǵan deiin Janat Shuǵaev Pavlodar aýdanyn basqarǵan, dep habarlaidy "Ult aqparat".
Aimaq basshysy Ábilqaiyr Sqaqov jańa basshyny Aqsý qalasynyń belsendilerine tanystyrdy.
Oblys ákimi Janat Shuǵaevtyń memlekettik jáne jeke sektordaǵy mol tájiribesin atap ótti.
Jergilikti máslihat Aqsý qalasynyń ákimi laýazymyna usynylǵan kandidatýrasyn maquldady.
- Ókinishke qarai, sońǵy bir ai úshinde bizdiń metallýrgter qalasynyń aty búkil el aýzynda. Aqsýdyń burynǵy ákimi tarapynan aitylǵan sózder BAQ betterinen túspedi. Men onyń árbir aitqan sóziniń quzyretti organdar tarapynan zerttelip, áli de tekserýden ótip jatqanyna sendirgim keledi. Nurjan Kemerulynyń birqatar málimdemelerin memlekettik organdar resmi túrde teriske shyǵaryp ta úlgerdi. Basqa máseleler boiynsha, men aityp ketkenimdei, tekserýler júrip jatyr. Qala ákimdigi ujymynyń ishinde qalyptasqan jaǵdai da qoǵam talqysyna tústi. Osyndai jaǵdaida, ókinishke qarai, Aqsý qalasynyń áleýmettik-ekonomikalyq damý kórsetkishteri tómendep barady. Ásirese, munyń bári Aqsý qalasynyń 60 jyldyq mereitoiy qarsańynda oryn alǵany ókinishti. Sondyqtan, qazir barlyq resýrstar jaǵdaidy turaqtandyryp, qala men onyń aýyldyq aimaǵynyń damý qarqynyn kúsheitý úshin jumyldyrylýy tiis, - dedi Ábilqaiyr Sqaqov jinalǵandar men jańa ákimge.
Aimaq basshysy birinshi kezekte jylý maýsymy bastalǵanǵa deiin jańa qazandyqtyń iske qosylýyn erekshe baqylaýǵa alyp, turǵyndar úshin tarifti qalyptastyrý máselesin tapsyrdy – jergilikti turǵyndardyń qarjylyq júktemesin azaitý múmkindigi qarastyrylmaq.
Sonymen qatar, biyl Aqsýdyń aýyldyq aimaǵy taza aýyz sýmen tolyq qamtamasyz etilýi qajet.
Taǵy bir basymdyq – ákimdik, qoǵam, biznes jáne investorlar arasyndaǵy konstrýktivti dialog.
- Oblystyq biýdjetten Aqsý qalasynyń birden 11 mektebin jóndep, jańartýǵa qarajat bólindi, - dedi mindetterdi tizbektep jalǵastyrǵan oblys ákimi. - Biyl iske asyrylyp jatqan «Zamanaýi mektep» baǵdarlamasy oblys ortalyǵy aiasynan shyǵyp, Aqsýdan bastalmaq. Bilim berý salasyn damytý – strategiialyq másele. Biz jas urpaqty damytý isin investitsiiany jasóspirimder men buqaralyq sportqa salý arqyly júrgizemiz. Muz arenasyn salý – erekshe nazarymyzdy qajet etetin taǵy bir mańyzdy másele.
Janat Shuǵaevqa qalany abattandyrýdy qolǵa alý tapsyryldy.
Aqsý ákimi bir ailyq merzim ishinde qala infraqurylymyn damytý jáne rekreatsiialyq aýmaqtardy qurý jónindegi usynystar jasaýy tiis. Aimaq basshysy josparǵa jergilikti turǵyndardyń talap-tilekteri men usynystaryn engizý mindetti ekenin atap ótti.
Aqsýdyń jańa ákimi qalanyń eski turǵyndary men eńbek ardagerlerine de jeke tanystyryldy.
- Biz óz qalamyzdy súiemiz, jas urpaqty tárbieleýge atsalysýǵa tyrysamyz, - dedi eńbek ardageri, Aqsý qara metallýrgiia kolledjiniń burynǵy direktory Fedor Kisenkov. - Jalpy, Aqsý qalasynda óz mekenin baǵalaityn jaqsy adamdar kóp. Búginde onyń 60 jas mereitoiyn oidaǵydai atap ótý úshin kóp is tyndyrý kerek. Sondyqtan biz Aqsý qalasynyń órkendeýine baǵyttalǵan árbir bastamany qoldaýǵa daiynbyz. Biz jańa atalǵan muz saraiynyń boi kóterýin kóp jyldar boiy kútip kelemiz.
Janat Shuǵaev 1960 jyly Pavlodar oblysynyń Mai aýdanynda dúniege kelgen.
1983 jyly Tselinograd aýylsharýashylyq institýtyn «ǵalym-agronom» mamandyǵy boiynsha támamdady.
Eńbek jolyn Pavlodar oblysynyń «Maiak» keńsharynda bastaǵan.
1985–1989 jyldary – Pavlodar oblystyq mamandandyrylǵan ekonomikalyq birlestiginiń bas agronomy.
1990–1991 jyldary «Maiak» keńshary direktorynyń orynbasary bolyp qyzmet etti. 1991–1997 j.j. «Pavlodar BATT» kompaniiasyn basqardy.
1997–1998 jyldary ol «BATT» korporatsiiasynyń Soltústik Qazaqstan oblysyndaǵy basshysy boldy.
Sodan keiin ol bes jyl boiy Petropavlda aldymen «Smirnovskii elevator» AQ, sodan keiin «Qiialy Astyq» JShS kásiporyndaryn basqardy.
2003 jyly ol SQO Aqqaiyń aýdanynyń ákimi bolyp taǵaiyndaldy.
2004-2006 jyldar aralyǵynda – «Mamliýtskii mýkomolnyi kombinat» AAQ prezidenti.
2006 jyldan 2007 jylǵa deiin – Kókshetaý qalasyndaǵy «BATT Agroinvest» JShS bas direktory. 2007 jyldan 2009 jylǵa deiin Shýchinsk qalasyndaǵy «Agrofirma Býrabai 2007» JShS basqardy.
2009–2012 jyldary Pavlodar oblysy Jelezin aýdanynyń ákimi, 2012–2013 jyldary – Ertis aýdanynyń basshysy qyzmetterin atqardy.
2013 jyldan 2014 jylǵa deiin Pavlodar oblysynyń aýyl sharýashylyǵy basqarmasynyń bastyǵy. 2014 jyldan 2018 jylǵa deiin - Kachir aýdanynyń ákimi (2018 jyldyń qyrkúieginen – Tereńkól aýdany).
2018 jyldyń jeltoqsanynda ol Pavlodar aýdanynyń ákimi bolyp taǵaiyndaldy.
