Foto: Pavlodar oblysynyń ákimdigi
Pavlodar qalasynyń turǵyny, Uly Otan soǵysynyń ardageri Nikolai Poddýbnyi 101 jasqa qaraǵan shaǵynda dúnieden ozdy, dep habarlaidy Ult.kz inbusiness.kz-ke silteme jasap.
Ol – Reseidiń Novosibir oblysynyń týmasy. 1942 jyly qolóner mektebin bitirgen soń áskerge shaqyrylyp, Omby qalasyndaǵy tank mektebinde oqydy. 1943 jyly maidanǵa attandy. Soltústik-batys jáne Ýkraina maidandarynda soǵysty. Jeke atqyshtar batalony quramynda diversant qyzmetin atqaryp, qarsylastardyń áskeri tehnikasy men qarý-jaraǵyn joiýǵa qatysty. Birneshe ret jaý tylyna jasyryn kirip, janar-jaǵarmai jáne basqa da múlikter saqtalǵan qoimalardy joiǵany da bar.
Maidanger jeńisti Germaniianyń Baýttsen qalasynda qarsy aldy. 1946 jyly zapasqa shyǵarylyp, Novosibir qalasyna oralyp, qalaiy kombinatynda jumys istedi. Qurmetti demalysqa shyqqan soń Pavlodar qalasyna qonys aýdaryp, 30 jyl aralyǵynda aimaq jastaryn áskeri-patriottyq tárbieleýge úles qosty.
Jaýyngerlik erlikteri úshin "Erligi úshin", "Germaniiany jeńgeni úshin" medaldarymen, Keńes Odaǵynyń marshaly "Jýkov" ordenimen, "Otan soǵysy" ordenimen, mereitoilyq nagradalarmen marapattalǵan.
Uly Otan soǵysynyń ardagerin aqtyq saparǵa shyǵaryp salý rásimine aimaq basshysy Asaiyn Baihanov, ardagerdiń týystary men jaqyndary qatysyp, beibit kúndi syilaǵan batyr erligi umytpaitynyn aitty.
Aita keteiik, Pavlodar oblysynda endi Uly Otan soǵysynyń 6 ardageri turady. Jeńistiń 80 jyldyǵyna orai olardyń árqaisysyna 5 mln teńgeden berilmek. Sondai-aq, soǵys kezinde fashister men olardyń odaqtastary qurǵan kontslagerler, basqa da májbúrli ustaý oryndarynyń kámeletke tolmaǵan tutqyndaryna 100 myń teńgeden 200 myń teńgege deiin, Leningradty qorǵaǵan azamattarǵa 60 myń teńgeden 150 myń teńgege deiin, tyl eńbekkerlerine 50 myńnan 100 myń teńgege deiin aqshalai tólem jasalady. Pavlodar óńirinde mundai tólem 3700 adamǵa qarastyrylǵan.
