Pavlodar oblysynda ákimdik jeti balanyń anasyn sotqa bermekshi.
Sheneýnikter kópbalaly ana ataýly áleýmettik kómekti zańsyz aldy dep aiyptap, 670 myń teńge járdemaqyny keri qaitarýdy talap etýde, dep habarlady Sputnik agenttigi "Astana" telearnasyna silteme jasap.
Múgedek balasy men kúieýin baǵyp otyrǵan aqsýlyq áiel qomaqty qarajatty qaitarýǵa qaýqarsyz.
Úsh jyl buryn ár balasyna memleketten 21 myń teńge alǵanyn moiyndaidy. Ákimdik múgedek balasyna alatyn qarajatty jasyrdyń dep jazǵyrǵan.
Ákimdik ony sotqa bermekshi. Óitkeni ataýly áleýmettik kómek alarda tabysyn jasyrǵan dep aiyptap otyr.
Al kópbalaly ana bolsa kirisin jasyrmaǵanyn aitady.
"Nege bizdi aiamaidy. Múgedekterge nege qamqorlyq jasamaidy. Meniń kinám ne sonda? Osylai zar jylap otyrǵan adamdy bilmedi, kórmedi, ótirik aitady deidi. Men qalai ótirik aitam myna túrimmen otyryp. Myna múgedek qyzdan seniń otbasyńa tabys kirip otyr deidi. Jatqan túri mynaý. Bir túgil eki múgedek baǵyp otyrmyn", - deidi Sairagúl Moldabaiqyzy.
Aitýynsha otbasynyń jalǵyz kirisi, ol múgedek balasy men kúieýine beriletin bolmashy járdemaqy ǵana. Moiyndaryna qaryz qylyp qoiǵan 670 myń teńgeni tóleýge shamasy joq.
Osydan eki jyl burynda bul máseleni kótergen bolatynbyz. Ol kezde ákimdik ókilderi qaryzdy demeýshiler kómegimen jaýyp beremiz dep te ýáde bergen edi. Alaida, ýádelerinde turmaǵan.
"Bul kisi aitqan joq jumys istedim dep. Bala kútimimen júrdim dedi. Túsinip otyrmyz. Ońai emes. Sondyqtan men de sizge aityp otyrmyn. Demeýshiler tarapynan kómek kórsetildi. Áli de kórsetemiz", - deidi Aqsý qalasy ákiminiń orynbasary Baltabai Qappasov.
Al zańger Kamisha Esmuhamedqyzy ákimdiktiń áreketi zańsyz dep baǵalaidy. Óitkeni shendiler ózderi jibergen qateliktiń saldarynan ortaiǵan qazyna qarjysyn toltyrýdy ǵana oilap otyr.
"Óziniń qarajaty jetip tursa, memleketten qol jaimaidy jáne suramaidy. Zańsyz aldy dep tanylǵany ne sot sheshimi joq. Ne ony qandai da bir qaǵaz júzinde tergeý amaldary zańsyz paidaǵa kenelgenin dáleldengen joq. Sondyqtan kópbalaly anaǵa 3 jyldan keiin qoiyp otyrǵan talap aryz negizsiz", -deidi ol.
Aqsý qalasy ákiminiń orynbasary, bul problemany ońtaily sheshemiz ýáde berdi. Biraq ony qashan oryndaityndaryn ashyp aitpady.
