10 shildeden bastap Ózbekstanda karantin sharasy qaita kúsheitildi, dep habarlaidy "Ult aqparat".
Koronavirýsqa qarsy kúres jónindegi arnaiy komissiianyń sheshimimen Ózbekstanda 10 shildeden 1 tamyzǵa deiin avtokólikter qozǵalysyna shekteý qoiylady. Uiym qyzmetkerleri qashyqtan jumys isteýge kóshedi. Budan bólek, toi ótkizýge, jappai jáne dini sharalar uiymdastyrýǵa tyiym salynyp, bazarlar, tamaqtaný oryndary, sport zaldar men shipajailar jabylady. 65 jastan asqan adamdarǵa qoǵamdyq oryndarda úsh adamnan artyq toptasyp júrýge tyiym salynady.
Sonymen qatar, saiabaqtardaǵy attraktsiondar, mektepke deiingi bilim berý mekemeleri, kiim-keshek satatyn bazarlar men azyq-túlik satpaityn iri dúkender, jattyǵý zaldary men basseinder, oqý kýrstary, úige deiin jetkizý qyzmeti bar tamaqtaný oryndaryn qospaǵanda, meiramhanalar, dámhanalar, ashanalar, sháihanalar, shipajai, pansionattar, balalar lagerleri, jaǵajailar qyzmetterin toqtatady.
Halyqaralyq áýe reisteriniń sany eki ese qysqarady. Halyqaralyq júk tasymalymen ainalysatyn júrgizýshiler koronavirýsqa test tapsyrýǵa mindetteledi.
El prezidenti videoselektorlyq jinalysta aýmaqtardy «jasyl», «sary» jáne «qyzyl» aimaqqa bólý jumystary tolyqqandy júrgizilmei jatqanyn málim etti. Ózbekstan prezidentiniń aitýynsha, shildeniń birinshi aptasynda aýrý juqtyrǵandar 2 167 adamǵa artqan. Sonyń ishinde 1 267 adam (58%) turǵyndar arasynan anyqtalǵan.
Ózbekstan Respýblikasy Densaýlyq saqtaý ministrliginiń málimetinshe, Ózbekstanda koronavirýsqa shaldyqqandar sany 11 259 adamǵa jetken. Elde koronavirýstan emdelip shyqqandar sany – 7 060 adam. 4 152 naýqas em qabyldap jatsa, sonyń ishinde 31-i – aýyr halde jáne 12-si – asa aýyr halde. 47 adam osy indetten qaitys bolǵan.
