Jer úilerdegi órtterdiń 26 paiyzy peshtiń durys ornatylmaýynan bolady. Tótenshe jaǵdailar ministri Iýrii Ilin halyqqa esep berý kezdesýinde osyndai málimet berdi, dep habarlaidy "Ult aqparat".
«Qysta órtterdiń sany 9%-ǵa ósti. 5 462 órtten 276 adam qaza tapty. 2019-2020 jylǵy maýsymda 5001 órt 222 adamnyń ómirin qiǵan bolatyn. Munyń sebebin taldasaq, negizgi úles turǵyn úi sektoryna tiesili dep aitýǵa bolady. Onyń ishinde 45% (2 461 órt) sharýashylyq qurylystaryna, jeke 43,6% turǵyn úilerge (2 382 órt), 11% kóp qabatty úilerge (619) keledi», - dedi Tótenshe jaǵdai ministri.
Vedomstvo basshysy órt oshaqtarynyń 30 paiyzdan astamy pesh turǵan as úi men turǵyn bólmelerden shyǵatynyn aitady.
«Órt qaýipsizdiginiń buzylý sebepteri boiynsha peshterdi ornatý jáne paidalaný kezinde 1 420 órt «26%), elektr jabdyqtaryn montajdaý jáne paidalaný kezinde 1 483 órt (27%) bolǵan. Qaza tapqan 276 adamnyń 97-si (nemese 35%-y) mas bolsa, 59-y (nemese 21%-y) tósekte jatyp temeki shekken», - deidi Iýrii Ilin.
Ministrdiń aitýynsha, azamattardyń qaýipsizdigi úshin ákimdikterdiń kómegimen 25 427 úide órt datchigi ornatylǵan. Sol qurylǵylardyń der kezinde belgi berýiniń arqasynda biyl 15 adam aman qalǵan. Ishinde kámeletke tolmaǵan 8 bala bar.
«Jergilikti atqarýshy organdarmen elektrmen jabdyqtaýdy aýystyrý jáne jóndeý jáne jylytý júielerin tazalaý boiynsha máseleler belsendi pysyqtalýda. Mysaly, bizdiń bastamamyz boiynsha Aqmola oblysy Atbasar aýdanynyń ákimdigi áleýmettik jaǵdaiy tómen otbasylarǵa elektr symdaryn aýystyrý jáne jylý júielerin jóndeý boiynsha 1 mln 290 myń teńge, qyzmet kórsetýge 1 million teńgeden astam qarjy bóldi», - dedi vedomstvo basshysy.
