Oralda «Mahambet batyr» jáne «Isatai batyr» shekara katerleri Shaǵan ózenine túsirildi, dep habarlaidy "Ult aqparat".
Atalǵan katerler «Oral «Zenit» zaýyty» AQ-da «Qaisar» jobasy boiynsha qurastyrylǵan.
Saltanatty rásimge qatysqan oblys ákimi Ǵali Esqalievtiń atap ótkenindei, «Zenit» zaýyty 1993 jyldan beri keme-katerler shyǵaryp, elimizdiń qorǵanys qabiletin nyǵaitýǵa qomaqty úlesin qosyp keledi.
«Katerler teńiz shekarasyn, Qazaqstannyń ekonomikalyq múddesin qorǵaýǵa, lańkestik áreketterdiń, balyqty zańsyz aýlaýdyń jáne taýarlardyń zańsyz tasymalynyń jolyn kesýge arnalǵan. «Zenit» zaýyty – elimizde katerler men kemelerdi shyǵaratyn birden-bir otandyq kásiporyn. Aldaǵy ýaqytta da onyń keleshegi jarqyn bolatynyna senemin», dedi óńir basshysy.
QR UQK Shekara qyzmeti basqarmasynyń bastyǵy, 1 rangaly kapitan Sabyr Hasanov «Zenit» zaýytynda jasalǵan kemelerdiń Kaspii teńizinde el shekarasyn abyroimen qorǵap kele jatqanyn jetkizdi.
«Qaisar» jobasy boiynsha jasalǵan atalǵan katerler de Kaspii teńizinde paidalanylatyn bolady. Onyń uzyndyǵy 14 metrdei, eni 3,5 metrdei. Sý yǵystyrylymy 15 tonnadai bolatyn kater jyldamdyǵyn 35 ýzelge deiin údete alady. Katerde ekipajǵa (4 adam) qosa qosymsha 4 qyzmetker ornalasa alady.
