Oral qalasynda monitoringtik toptar kúsheitilgen rejimde jumys jasap jatyr, dep habarlaidy "Ult aqparat".
Qala ákimi Abat Shynybekovtiń málim etkenindei, sáýir aiynan beri shahar 4 ýchaskege bólinip, 8 top (jartysy qalada, tórteýi kent ákimdikterinde) reidterge turaqty shyǵýda.
Abat Abaiulynyń sózine qaraǵanda, kún saiyn jolaýshylar avtobýstarynda sanitarlyq-epidemilogiialyq talaptardyń saqtalýyna monitoring, sondai-aq júrgizýshilermen, kondýktorlarmen jáne jolaýshylarmen túsinik jumystary júrgiziledi. Avtobýs parkteriniń basshylary sanitarlyq talaptar saqtalmaǵan jaǵdaida aiyppul salynyp, sýbsidiia tólengen kezde qarjynyń ustalynyp qalatyny eskertildi.
Monitoring barysynda 19-26 maýsym aralyǵynda sanitarlyq talapty buzǵan 19 júrgizýshi, 1 kondýktor anyqtaldy.
«Sońǵy kezde Oral qalasynda koronavirýs juqtyrǵandardyń kóbeigenine qaramastan, toi-tomalaq jasaýshylar tyiylmai otyr. 21-27 maýsym aralyǵynda «Samal», «Ámina», «Ata-ana», «Qorjyn», «Grand Zodiak» jáne «Arbat» meiramhanalarynda karantindik talaptar buzylýyna bailanysty qalalyq sanitarlyq-epidemiologiialyq baqylaý basqarmasyna material daiyndalýda. Bul baǵyttaǵy jumys kúsheitiledi», dedi qala basshysy.
Jyl basynan beri nysandarda karantin talaptaryn buzýshylyqtyń 198 deregi belgili boldy. Barlyǵy 7,3 mln astam teńgege 128 hattama toltyryldy.
