Oralda 32 jastaǵy Qýanysh Ahmetovty ólgenshe sabaǵan kúzetshilerdiń soty qaita bastaldy. Er adamdy politsiia jańa jyldyq korporativten alyp ketken. Keiin onyń jedel járdem kóligende qaza tapqany belgili boldy, - dep habarlaidy Tengrinews.kz.
Bastapqyda is Oral qalalyq sotynda qaralǵan. Aiyptalýshy tarapynda eki adam - "Sova" jeke kúzet agenttiginiń burynǵy qyzmetkerleri Abzal Ádilov pen Aian Kafizov. Kúdiktilerge "Abaisyzda jábirlenýshiniń ólimine ákep soqqan densaýlyqqa qasaqana aýyr ziian keltirý" jáne QR QK-niń 252-baby "Jeke kúzet qyzmetkerleriniń ókilettikterin asyra paidalanýy" boiynsha aiyp taǵyldy. Biraq qyrkúiekte is prokýratýraǵa qaitarylǵan. Sottalýshylarǵa QR QK-nyń 99-baby 2-bóligi "Adam óltirý" boiynsha aiyp taǵyldy.
Jańa protsess Batys Qazaqstan oblysynyń qylmystyq ister jónindegi mamandandyrylǵan aýdanaralyq sotynda sýdia Sharainýllinanyń tóraǵalyǵymen ótti. Aiyptalýshy tarapqa taǵy bir sottalýshy Ábýtáli Qonysqali qosylǵan. Ony sot otyrysy barysynda qamaýǵa aldy. Bul týraly jábirlenýshi tarapty qorǵaý jáne memlekettik aiyptaý ótinish bildirdi. Burynǵy kúzetshi qyzmettik ókilettigin asyra paidalandy dep aiyptaldy.
"Sottan baýyrymnyń ólimine kinálilerdi zańnyń barlyq qatańdyǵy boiynsha jazalaýdy suraimyz. Marqumnyń artynda áieli men bir jarym jasar qyzy qaldy. Aiyptalýshylar mas kúiinde Qýanyshty ólgenshe sabaǵan. Olar qolyn julyp, kózin aǵyzyp, jaǵyn jáne murynyn syndyrdy. Bul ádeii jasaldy. Qazir sybailas jemqorlyqqa qarsy qyzmet baýyrymdy jiynnan alyp ketken politseilerge qatysty sotaldy tergeý júrgizip jatyr, BQO PD ózindik qaýipsizdik basqarmasy taǵy 7 qylmystyq is qozǵady", - dedi marqumnyń ápkesi Baqyt Ahmetova.
Aita keteiik, qaiǵyly oqiǵa byltyr jeltoqsanda bolǵan. Korporativten "kóńildi" shyqqan jigitti politsiia narkologiialyq dispanserge jetkizgen. Ol jabyq mekemede búlik shyǵarǵan soń, kómekke shaqyrtylǵan kúzetshiler jigitti ólimshi etip, tepkiniń astyna alady. Er adam jedel járdemde qaza boldy.
Osy oqiǵanyń egjei-tegjeiin jariialaǵannan keiin birneshe politsiia qyzmetkeri laýazymynan shettetilip, BQO Politsiia departamenti bastyǵynyń eki orynbasary qatań sógis alǵan edi.
