Oral jolaýshylar poiyzy 25 jastaǵy er adamdy qaǵyp ketti, - dep habarlaidy "Ult aqparat". Temirjolshylardyń aitýynsha, er adam qulaqqap taǵyp alyp, qozǵalyp bara jatqan poiyzdyń alynan júgirip ótpek bolǵan.
BQO densaýlyq saqtaý basqarmasynyń baspasóz hatshysy Ainagúl Saqposynovanyń sózine súiensek, oqiǵa búgin tańmen Jelaev tas joly boiynda, «Kar siti» kesheni mańynda boldy.
Saǵat 09.10-da temirjol vokzalynyń kezekshisi jedel járdem shaqyrtty. Brigada bes minýttan keiin jetti. Bas pen midyń ashyq jaraqatyn alǵan 1996 jylǵy jigit qalalyq kópbeiindi aýrýhanaǵa jetkizildi. Alaida ol ota ústinde kóz jumdy.
QR IIM Kóliktegi politsiia departamentiniń baspasóz qyzmetinen túsken málimetke qaraǵanda, atalǵan derek QR QK 344-baby 1-bóligine (temirjol kóligi qozǵalysynyń qaýipsizdik qaǵidalaryn buzý) sáikes Oral stantsiiasyndaǵy jelilik politsiia bóliminiń sotqa deiingi tergep-tekserýdiń biryńǵai tiziliminde tirkelgen.
QR IIM Kóliktegi politsiia departamenti atalǵan oqiǵanyń QR QK 344-baby 2-bóligine (abaisyzda adam ólimine ákep soqqan temirjol kóligi qozǵalysynyń qaýipsizdik qaǵidalaryn buzý) sáikes qaita saralanǵanyn jetkizdi.
Poiyz adam qaqqannan keiin biraz ýaqyt toqtap turdy, biraq keiin qozǵalysyn jalǵastyrdy.
