Oralda basynan aýyr jaraqat alǵan er adam jedel járdem kóliginde kóz jumdy, dep habarlaidy "Ult aqparat".
BQO politsiia departamentiniń baspasóz qyzmetinen túsken málimetke qaraǵanda, oqiǵa 19 maýsym kúni túsqaita Sholohov pen Tsiolkovskii kósheleriniń qiylysynda boldy.
Buryn bir-birin tanymaityn 20 jáne 46 jastaǵy turǵyn sózge kelgen. Saldarynan tóbeles bolyp, 20 jastaǵy jigit urǵan kezde er adam jerge qulap, jabyq bas-mi jaraqatyn alǵan.
46 jastaǵy er adam esin jimastan, qalalyq kópbeiindi aýrýhanaǵa apara jatqan jolda jedel járdem kóliginde qaitys boldy.
Múrde sot-meditsinalyq saraptamaǵa jiberildi.
Kúdikti Báiterek aýdanynda turady.
Qazirgi kezde QR QK 106-baby 3-bóligine (qasaqana aýyr dene jaraqatyn salý) sáikes sotqa deiingi tergeý amaldary júrgizilýde.
Oblystyq densaýlyq saqtaý basqarmasynyń baspasóz hatshysy Ainagúl Saqposynovanyń aitýynsha, jedel járdem saǵat 15.25-te shaqyrtylyp, brigada bes minýttan keiin jetti. Er adam Sholohov kóshesi boiyndaǵy «Gýrman» kafesi janynda qulap jatqan. Jabyq bas-mi jaraqatyn alyp, komaǵa túsken ol aýrýhanaǵa jetpei, qaitqan.
