Foto: Videodan skrin
Astanada 13 jastaǵy Ádilhan Ábildinovtiń operatsiiadan keiin qaitys bolýyna qatysty is boiynsha sotta jaryssóz kezeńi bastaldy. Aiyptalýshy oryndyǵynda – operatsiiaǵa qatysqan anesteziolog, dep habarlaidy Ult.kz “Birinshi Eýraziia” arnasyna silteme jasap.
Memlekettik aiyptaýshy men jábirlenýshi taraptyń aitýynsha, jasóspirimniń ómirin saqtap qalýǵa múmkindik bolǵan, alaida operatsiia kezinde jiberilgen qatelik qaiǵyly jaǵdaiǵa ákelgen. Al qorǵaýshy tarap dárigerdiń áreketi durys bolǵanyn aityp, aiyptaýmen kelispeitinin málimdedi.
Ábildinovter otbasy úshin bul sot protsesi óte aýyr ótip jatyr. 2024 jyldyń shildesinde olardyń jalǵyz uly josparly operatsiia kezinde kóz jumǵan. Aldyn ala tekserýler qarsy kórsetilimderdi anyqtamaǵandyqtan, dárigerler aǵzadaǵy ósindini alyp tastaý týraly sheshim qabyldaǵan.
Memlekettik aiyptaýshynyń aitýynsha, bala tynys joldarynyń bitelýi saldarynan qaitys bolǵan. Aiyptaý taraby anesteziolog tynys joldaryn qorǵaý úshin qoldanylatyn manjetti durys ornatpaǵan degen nusqany alǵa tartty. Al qorǵaýshy tarap bul pikirmen kelispeidi jáne qannyń basqa sebeppen túsýi múmkin ekenin aitty.
Sotta aiyptalýshy dáriger de sóz sóilep, eń aldymen ata-anasyna kóńil aitty. Onyń aitýynsha, ol sol sáttegi klinikalyq jaǵdaiǵa súienip áreket etken.
Jábirlenýshi tarap oqiǵadan keiingi áreketterge de narazylyq bildirdi. Olardyń aitýynsha, keibir meditsinalyq qujattar joǵalyp ketken, al operatsiia bólmesindegi beinejazba saqtalmaǵan. Sondai-aq marqum balanyń anasy tergeý barysynda iske aralasý áreketteri bolǵanyn málimdedi.
Memlekettik aiyptaýshy sottan aiyptalýshyny kináli dep tanyp, eki jyl bas bostandyǵynan aiyrýdy jáne úsh jylǵa meditsinalyq qyzmetpen ainalysý quqyǵynan aiyrýdy surady. Kelesi sot otyrysy 26 naýryzǵa belgilengen. Onda aiyptalýshy sońǵy sózin aitady.
