Ońtústik Koreiada tolassyz jaýǵan jańbyr men kúshti jeldiń saldarynan sý tasqyny bolyp, úsh adam qaza tapty jáne ondaǵan adam zardap shekti. Bul týraly Yonhap habarlady.
Tabiǵi apattarǵa qarsy kúres basqarmasynyń ortalyq shtab-páteri beisenbi keshke úsh adamnyń óz avtokólikterinde óli kúide tabylǵanyn habarlady. Olardyń kólikteri Pýsan qalasyndaǵy jerasty ótkelinde sý astynda qaldy. Sondai-aq, bir adamnyń iz-túzsiz joǵalǵany habarlady.
Hyundai Motor negizgi zaýyttary ornalasqan Ýlsan ónerkásiptik qalasynda da nóser jańbyr jaýǵan. Onyń mólsheri 215,5 millimetrdi quraǵan. Sonyń saldarynan qalada kóshkin men sý tasqyny bolǵan.
Tabiǵi apatqa qarsy kúres ulttyq ortalyǵynyń málimetinshe, jalpy elde 195 adam evakýatsiialanǵan.
Eldegi kólemi boiynsha ekinshi qala sanalatyn Pýsanda saǵatyna 80 mm jaýǵan nóser kóptegen kóshkinniń júrýine sebep bolǵan.
Turǵyndar áleýmettik jelilerde belsendi bólisip jatqan sýretterden jańbyr sýynyń aǵyny jerasty metrosyna aǵyp jatqanyn kórýge bolady. Kóptegen avtobýstar jartylai sýǵa batyp qalǵan. Qala kósheleri alyp kólge ainalǵan. Pýsanda 162 úidiń sý astynda qalǵany tirkelgen.
El astanasy Seýlde qala magistraldarynyń keibir bóligi sý deńgeiiniń kóterilýine bailanysty jabyldy. Kiongido provintsiiasynda 1100 abonenttiń jaryǵy ýaqytsha sónip qalǵan.
Meteorologtardyń málimetinshe, Seýlde, Inchhonda jáne Kiongido provintsiiasynda nóser juma kúni toqtaidy.
