QR Bilim jáne ǵylym ministrligi bergen tapsyrmaǵa sáikes barlyq joǵary oqý oryndary qosymsha shyǵyndarǵa ushyrap jatyr. Bul týraly Ortalyq kommýnikatsiialar qyzmetinde onlain ótken brifingte QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Joǵary oqý oryndaryna akademiialyq jáne qarjylyq derbestik berilgen, sondyqtan oqý aqysy qansha bolatyny týraly máseleni ár institýt, ár ýniversitet, ár akademiia ózi sheshedi. Qashyqtan oqytqanda shyǵyn az bolady degen túsinik bar. Negizinde olai emes, mysaly oqý ornynda 5 korpýs bolsa, beseýi de jabylmaidy. Onyń kommýnaldyq shyǵyndary, jumys istep jatqan oqytýshylardyń shyǵyndary bar», - deidi Bilim jáne ǵylym ministri Ashat Aimaǵambetov.
Onyń aitýynsha, qashyqtan oqý rejimine kóshkenge deiin joǵary oqý oryndarynda qashyqtan oqý júieleri, tehnologiialary bolmaǵan.
«Sondyqtan olar qazirgi ýaqytta arnaiy shyǵyndanyp, arnaiy júielerdi satyp alyp jatyr. Internet kúshin keńeitýde. Biz bergen tapsyrmaǵa sáikes barlyq joǵary oqý oryndary qosymsha shyǵyndarǵa ushyrap jatyr. Bul ministrlik emes, ár ýniversitet ózi sheshetin másele», - deidi ol.
