Qazaqstan Musylmandary dini basqarmasynyń tóraǵasy, Bas múfti Naýryzbai qajy Taǵanuly onlain shalynǵan qurban etterin muqtajdarǵa taratýǵa volonterlerdi shaqyrdy, dep habarlaidy QazAqparat .
«Karantin kezinde onlain qurbandyq shalý jobasyna memleketimiz qoldaý kórsetýde. Ár oblysta qurban shalatyn oryndar belgilenip, jergilikti ákimdik pen sanitarlyq dárigerlerdiń ruqsatymen, tártip saqshylarynyń qadaǵalaýymen karantin talaptaryn qatań túrde saqtai otyryp oryndalady. Osy tusta ár oblystyń dini ahýalyna jaýap beretin mekemelerdi bizdiń oblystyq ókildiktermen birge jumys isteýge shaqyramyn. Osy maqsatta dini basqarma men obylstyq meshitter janynan aqparat berý ortalyqtary da quryldy. Onlain qurbandyq týraly aqparat alǵysy keletin azamattar osy ortalyqtarǵa habarlasa alady», - dedi spiker Ortalyq kommýnikatsiialar qyzmetinde ótken onlain brifingte.
Sonymen birge, Bas múfti osyndai qiyn-qystaý kezde azamattardy pendeshilikke salynyp, paida tabý men alypsatarlyqqa barmai, mal baǵasyn qymbattatpaýǵa, halyqtyń jaǵdaiyn eskerýge shaqyrdy.
«Qasapshylar da óz qyzmetine alatyn aqysyn qymbattatpai, janashyrlyqpen elge qyzmet etedi dep úmittenemiz. Qurbandyq shalýdy júzege asyrý úshin oblys, qala ákimderin, sanitarlyq-epidemiologiialyq basqarma qyzmetkerlerin tártip saqshylarymen birlesip atsalysýǵa úndeimin. Shalynǵan qurban etterin áleýmettik az qamtylǵan otbasylarǵa, muqtaj jandarǵa úlestirý úshin eriktilerdi saýaby mol iske qol ushyn berýge shaqyramyz», - dedi Naýryzbai qajy Taǵanuly.
